Berlin polisi kifayət qədər uyğun namizəd tapa bilmədiyi üçün nəzərdə tutulan bütün hazırlıq yerlərini doldurmaqda çətinlik çəkir. Əsas maneələrdən biri namizədlərin alman dili üzrə yazılı imtahandakı nəticələridir.
MSNews.az xəbər verir ki, “Welt” məlumatına görə, polisə müraciət edənlərin təxminən 40%-i alman dili testinin minimum tələblərini ödəyə bilmir. İmtahanın əsas mərhələlərindən biri diktədir, bununla yanaşı namizədlərin qrammatika bilikləri də yoxlanılır.
Berlin Polis Akademiyasının rəhbəri Nensi Boy-Zayfert daha əvvəl bildirib ki, namizədlərin 40%-ə yaxını diktə və ya digər alman dili testindən, bəziləri isə hər iki mərhələdən keçə bilmir. 2024 və 2025-ci illərdə polis hazırlığına müraciət edən 10 874 nəfərdən 4271-i — 39%-i yazılı alman dili testində uğursuz olub. Bu rəqəmlər Berlin polisi və Senatın parlament sorğusuna təqdim etdiyi məlumatlarda da əks olunub.
Problemin nəticəsi qəbul göstəricilərində də görünür. “RBB” bildirir ki, ötən il Berlin polisində nəzərdə tutulan 1224 hazırlıq yerindən yalnız 936-sı doldurulub. Beləliklə, 288 yer boş qalıb. Polis rəhbərliyi bunun müraciətlərin azlığı ilə deyil, kifayət qədər namizədin seçim meyarlarını ödəməməsi ilə bağlı olduğunu vurğulayır.
Berlin polisinin rəhbəri Barbara Slowik Meisel dil tələblərinin aşağı salınmasının mümkün olmadığını bildirib. Onun sözlərinə görə, polis əməkdaşları gündəlik fəaliyyətdə hüquqi əsasları başa düşməli, vətəndaşlara görülən tədbirləri izah etməli və hadisələri yazılı şəkildə düzgün rəsmiləşdirməlidirlər. Meisel problemin namizədlərin milliyyəti və ya mənşəyindən asılı olmadığını da xüsusi vurğulayıb.
Berlin polisi namizədlərə hazırlaşmaq üçün nümunə diktələr təqdim edir. Rəsmi qəbul qaydalarına əsasən, namizəd kompüter testində yalnız diktə mərhələsindən keçə bilmədikdə, ona başqa mətnlə testi bir dəfə təkrar etmək imkanı da verilir.
