Səudiyyə Ərəbistanı İraq ərazisindən buraxılan bir neçə pilotsuz uçuş aparatının ölkənin Şərq vilayətindəki neft obyektlərini hədəfə aldığını açıqlayıb.
MSNews.az xəbər verir ki, Səudiyyə Ərəbistanının Müdafiə Nazirliyi hava hücumundan müdafiə qüvvələrinin PUA-ları hədəflərə çatmadan məhv etdiyini bildirib. Ər-Riyad hücumun İranın dəstəklədiyi İraq silahlı qrupları tərəfindən həyata keçirildiyini iddia edib və Bağdad hakimiyyətini ölkə ərazisinin qonşu dövlətlərə hücum üçün istifadəsinin qarşısını almağa çağırıb.
Bu barədə “Reuters” məlumat yayıb.
Hücumun konkret olaraq hansı qrup tərəfindən həyata keçirildiyi müstəqil şəkildə təsdiqlənməyib. İraqdakı bəzi silahlı qruplar hadisədə iştiraklarını rədd edərək məsuliyyətin Yəməndəki husilərin üzərinə düşdüyünü bildiriblər. Husilər isə həmin günlərdə Səudiyyə Ərəbistanının enerji infrastrukturu və dəniz nəqliyyatına qarşı əməliyyatlar keçirdiklərini açıqlayıblar.
Bəzi regional mənbələr hücumun husilərlə İraqdakı İranpərəst silahlı birləşmələrin koordinasiyası əsasında həyata keçirildiyini yazır. Bununla belə, əməliyyatın İran İslam İnqilabı Keşikçiləri Korpusunun birbaşa nəzarəti altında təşkil edilməsi barədə iddia açıq rəsmi sübutlarla təsdiqlənməyib.
Husilərlə İraq silahlı qrupları arasında əlaqələrin uzun müddətdir mövcud olduğu bildirilir. “The New Arab” yazır ki, husi lideri Əbdülməlik əl-Husi 2024-cü ildə İraq qrupları ilə birgə əməliyyat otağının yaradıldığını açıqlayıb. Həmin ilin sonlarında tərəflər İsrailə qarşı ilk birgə əməliyyat keçirdiklərini iddia ediblər.
İraqın İranla əlaqəli ən güclü silahlı qruplarından biri hesab olunan “Kətaib Hizbullah”la husilər arasında maliyyə, siyasi və əməliyyat əlaqələrinin genişləndiyi barədə daha əvvəl də məlumatlar yayılıb. Bununla belə, son hücumun həmin qrup tərəfindən həyata keçirildiyini göstərən müstəqil sübut açıqlanmayıb.
Hücumdan sonra ABŞ və Səudiyyə Ərəbistanı İraqda İranın dəstəklədiyi silahlı qruplara aid mövqelərə birgə aviazərbələr endirib. “Associated Press” əməliyyatın son günlər ABŞ və Səudiyyə obyektlərinə qarşı həyata keçirildiyi bildirilən 30-dan çox PUA hücumuna cavab olduğunu yazıb. Zərbələr nəticəsində azı 20 döyüşçünün öldüyü bildirilir.
İraq hökuməti ölkə ərazisində həyata keçirilən ABŞ–Səudiyyə zərbələrini suverenliyin pozulması adlandırıb və əməliyyat barədə əvvəlcədən məlumatlandırılmadığını bəyan edib. İraqın Baş naziri Əli əz-Zeydi hadisədən sonra Səudiyyə Ərəbistanına planlaşdırılan səfərini təxirə salıb.
Bağdad, eyni zamanda, Səudiyyə Ərəbistanına qarşı hücumların İraq ərazisindən həyata keçirilməsi ilə bağlı araşdırmaya başladığını açıqlayıb. Hadisə İraq hökumətinin silahlı birləşmələri dövlət nəzarətinə tabe etdirmək səyləri və Ər-Riyad–Bağdad münasibətləri üçün yeni risk yaradıb.
