Azərbaycan Respublikasının Prezidenti İlham Əliyev iyulun 30-da Qırğızıstan Respublikasına dövlət səfərinə gəlib.
MSNews.az xəbər verir ki, dövlət başçısını daşıyan təyyarə Çolpon-Ata şəhərindəki İssık-Kul Beynəlxalq Hava Limanına enib. Hava limanında Prezident İlham Əliyevin şərəfinə fəxri qarovul dəstəsi düzülüb.
Prezident İlham Əliyevi və birinci xanım Mehriban Əliyevanı Qırğızıstan Prezidenti Sadır Japarov və birinci xanım Ayqul Japarova qarşılayıblar.
Qırğızıstanın “Kabar” agentliyi də Azərbaycan Prezidentinin dövlət səfəri ilə Çolpon-Ataya gələcəyini əvvəlcədən açıqlamışdı.
Səfər çərçivəsində Azərbaycan və Qırğızıstan liderləri arasında ikitərəfli danışıqların keçirilməsi, dövlətlərarası əməkdaşlığın müxtəlif istiqamətlərinin müzakirəsi nəzərdə tutulur.
Prezident İlham Əliyev, həmçinin iyulun 30-dan avqustun 1-dək Çolpon-Atada keçirilən Azərbaycan və Mərkəzi Asiya dövlət başçılarının qeyri-rəsmi məsləhətləşmə görüşündə iştirak edəcək. Toplantıda ticarət, nəqliyyat, energetika, turizm, humanitar əməkdaşlıq və regional təhlükəsizlik məsələlərinin müzakirəsi planlaşdırılır.
