“Maklaren” komandasının britaniyalı pilotu Lando Norris Formula 1 üzrə 2026-cı il mövsümünün Macarıstan Qran-prisində qalib gəlib.
MSNews.az xəbər verir ki, yarışa birinci mövqedən başlayan Norris 70 dövrədən ibarət mübarizəni lider kimi başa vurub. Bu, son dünya çempionunun cari mövsümdə ilk qələbəsi olub. “The Guardian” yazır ki, bu nəticə “Maklaren”in mövsümdəki qələbəsiz seriyasına da son qoyub.
“Red Bull”un niderlandlı pilotu Maks Ferstappen yarışı ikinci sırada tamamlayıb. “Mercedes”in italiyalı sürücüsü Kimi Antonelli isə yeddinci mövqedən start götürməsinə baxmayaraq, üçüncü yerə yüksələrək fəxri kürsünü tamamlayıb.
Yarışın ilk hissəsində Norrisin komanda yoldaşı Oskar Piastri liderliyi ələ keçirib. Lakin avstraliyalı pilot sürət qutusunda yaranan nasazlıq səbəbindən mübarizəni davam etdirə bilməyib. Norris pit-stop strategiyasından uğurla istifadə edərək yenidən önə keçib və finişədək mövqeyini qoruyub.
“Ferrari” pilotu Lyuis Hemilton əvvəlcə dördüncü yeri tutsa da, pit yolunda sürət həddini aşdığı üçün cəzalandırılıb və yekun sıralamada beşinci yerə düşüb. Onun komanda yoldaşı Şarl Lekler bunun nəticəsində dördüncü olub.
Norris Macarıstanda ardıcıl ikinci dəfə qalib gəlib. O, 2025-ci ildə də Hunqarorinq trasındakı yarışı birinci yerdə tamamlamışdı. Britaniyalı pilot həmin mövsümün sonunda Maks Ferstappeni iki xal qabaqlayaraq karyerasında ilk dəfə dünya çempionu olmuşdu.
“Cadena SER” qeyd edir ki, Norris bu qələbə ilə 255 gün davam edən qalibiyyətsiz seriyasını başa vurub. Kimi Antonelli isə üçüncü yer sayəsində pilotlar çempionatındakı liderliyini möhkəmləndirib.
