ABŞ-ın Nyu-York ştatındakı Salamanka Şəhər Mərkəzi Məktəb Dairəsi “Sally” adlı humanoid robotu orta məktəbin STEAM proqramında müəllim köməkçisi kimi sınaqdan keçirməyə hazırlaşır.
MSNews.az xəbər verir ki, layihə bəzi sosial media paylaşımlarında “Nyu-York məktəblərinin robot-müəllimləri işə götürməsi” kimi təqdim edilsə də, rəsmi məlumatda söhbət müəllimləri əvəz edəcək robotlardan deyil, bir məktəb dairəsində həyata keçirilən pilot proqramdan gedir. Məktəb rəhbərliyi texnologiyanın yalnız tədrisə dəstək vasitəsi olacağını xüsusi vurğulayıb.
“New York Focus” yazır ki, Salamanka ölkədə humanoid robotu sinif otağına gətirən ilk məktəb dairələrindən biri olacaq. “Sally” ilkin mərhələdə yuxarı sinif şagirdlərinin kodlaşdırma, robototexnika və süni intellekt dərslərində istifadə ediləcək. Layihənin uğurlu olacağı təqdirdə onun digər dərslərə də genişləndirilməsi nəzərdən keçirilə bilər.
“Realbotix” şirkətinin hazırladığı robot oturaq vəziyyətdə fəaliyyət göstərəcək, üz ifadələri yarada, başını, qollarını və əllərini hərəkət etdirə biləcək. Sistemə məktəb dairəsinin təsdiqlədiyi tədris proqramı və Salamanka ilə bağlı məlumatlar yüklənəcək. Robot açıq internetdə axtarış aparmayacaq və məlumat bazasında olmayan suallara cavab uydurmaq əvəzinə bunu bilmədiyini bildirəcək.
Şagirdlər sistemə anonim identifikasiya kodu ilə daxil olacaqlar. Bu kod əvvəlki ünsiyyət və tədris fəaliyyəti əsasında dərsin davam etdirilməsinə imkan verəcək. Məktəb dairəsinin açıqlamasına görə, sistem şagirdlərin şəxsiyyətini müəyyənləşdirən məlumatları toplamamalı, video və səs yazmamalı, həmçinin məlumatları “Realbotix” şirkətinə ötürməməlidir.
“Inc.” layihənin robot və rəqəmsal köməkçi daxil olmaqla məktəb dairəsinə 57 590 dollara başa gəldiyini bildirib. Bununla belə, rəsmi açıqlamalarda robotun müəllim əməkhaqqına qənaət məqsədilə alınması təsdiqlənmir. Əksinə, məktəb rəhbərliyi müəllimlərin tədris prosesinin mərkəzində qalacağını bəyan edib.
“Realbotix” insanabənzər kommersiya və “yoldaş” robotların hazırlanması ilə də tanınır. Lakin şirkət Salamanka üçün nəzərdə tutulan modelin xüsusi olaraq təhsil məqsədilə hazırlandığını və məktəbdə istifadə üçün ayrıca təhlükəsizlik məhdudiyyətləri ilə təchiz olunduğunu bildirir.
Pilot layihənin əsas məqsədi şagirdlərə yeni texnologiyalarla praktiki işləmək imkanı yaratmaq, fərdiləşdirilmiş tədrisi sınaqdan keçirmək və onların süni intellekt və robototexnika sahələrinə marağını artırmaqdır. Layihənin tədris nəticələrinə real təsiri isə yalnız tətbiqdən sonra qiymətləndirilə biləcək.
