“Nokia” brendi altında 44 günədək gözləmə müddəti və digər cihazları enerji ilə doldurmaq imkanına malik yeni düyməli telefon təqdim olunub.
MSNews.az xəbər verir ki, “Nokia 300 Power Bank” adlanan model Filippində ilkin sifarişə çıxarılıb. Telefonların istehsalçısı “HMD” hazırda “Nokia” brendli düyməli telefonların istehsalı ilə məşğuldur.
“Notebookcheck” nəşrinin məlumatına görə, cihaz 3 700 mAh tutumlu akkumulyatorla təchiz edilib və 18 vatt gücündə enerji yığmanı dəstəkləyir. İstehsalçının açıqladığı göstəriciyə əsasən, telefon gözləmə rejimində 44-45 günədək işləyə bilər. Bu müddət aktiv istifadəni deyil, cihazın gözləmə rejimində qalmasını nəzərdə tutur.
Modelin əsas xüsusiyyətlərindən biri 5 vattlıq əks enerji doldurma funksiyasıdır. Telefon USB kabel vasitəsilə qulaqcıq, ağıllı saat, başqa telefon və az enerji tələb edən cihazlar üçün portativ enerji mənbəyi kimi istifadə oluna bilər. Əks enerji doldurma funksiyasını aktivləşdirmək üçün korpusda ayrıca düymə yerləşdirilib.
“Nokia 300 Power Bank” 2,4 düymlük QVGA ekran, 0,3 meqapiksellik kamera və 32 GB-dək “microSD” yaddaş kartı dəstəyi ilə təchiz olunub. Cihazda 4G, “Bluetooth”, USB-C girişi, 3,5 millimetrlik qulaqcıq yuvası, FM-radio və media pleyer də mövcuddur.
Telefonun möhkəmləndirilmiş və sürüşməyə qarşı hazırlanmış korpusu IP65 standartına uyğundur. Bu göstərici cihazın toza qarşı tam qorunduğunu və aşağı təzyiqli su şırnaqlarına davamlı olduğunu bildirir. Bununla belə, telefonun suya batırılması nəzərdə tutulmayıb.
Yeni model güclü LED fənərlə də təchiz edilib. Şirkətin təqdimat məlumatına görə, tam enerji ilə fənərdən 23 saatadək, telefon danışığından və ya musiqi dinləmə funksiyasından isə 26 saatadək istifadə etmək mümkündür.
Telefon qara, yaşıl və qızılı rənglərdə təqdim edilir. Filippində onun ilkin sifariş qiyməti 1 990 Filippin pesosu müəyyənləşdirilib. Modelin digər ölkələrdə satışa çıxarılacağı tarix və qiyməti hələlik rəsmi şəkildə açıqlanmayıb.
