Azərbaycanın xarici işlər naziri Ceyhun Bayramovla Rusiyanın xarici işlər naziri Sergey Lavrov arasında Moskvada danışıqlar keçirilib.
MSNews.az xəbər verir ki, iyulun 17-də baş tutan görüş əvvəlcə təkbətək, daha sonra nümayəndə heyətlərinin iştirakı ilə geniş tərkibdə davam etdirilib. Danışıqlardan sonra nazirlər birgə mətbuat konfransında çıxış ediblər.
Tərəflər Azərbaycan-Rusiya münasibətlərinin mövcud vəziyyətini və inkişaf perspektivlərini, iqtisadi-ticari və humanitar əməkdaşlığı, Cənubi Qafqazdakı prosesləri, eləcə də regional və beynəlxalq gündəmdə duran məsələləri müzakirə ediblər. Sergey Lavrov görüşdə “3+3” regional məşvərət platformasına marağın artdığını da bildirib.
Ceyhun Bayramov birgə mətbuat konfransında Azərbaycanla Rusiyanın münasibətlərdə yaşanan mürəkkəb mərhələni geridə qoyduğunu və ikitərəfli əlaqələrin normallaşdığını deyib. Nazir bu prosesdə iki ölkə prezidentlərinin şəxsi təşəbbüslərinin mühüm rol oynadığını vurğulayıb.
Lavrov isə iki ölkənin 2022-ci ildə imzalanmış Müttəfiqlik Qarşılıqlı Fəaliyyəti haqqında Bəyannamənin potensialını reallaşdırmaq istiqamətində irəlilədiyini bildirib. O, Rusiyanın Azərbaycanın əsas ticarət tərəfdaşlarından biri olaraq qaldığını və iqtisadi əməkdaşlığın inkişaf etdiyini qeyd edib.
Danışıqların yekununda Azərbaycan və Rusiya xarici işlər nazirlikləri arasında 2026–2027-ci illər üçün məsləhətləşmələr planı imzalanıb. Sənəd iki ölkənin xarici siyasət qurumları arasında əlaqələrin və müxtəlif istiqamətlər üzrə siyasi dialoqun davam etdirilməsini nəzərdə tutur.
Ceyhun Bayramov yaxın vaxtlarda Azərbaycanla Rusiya arasında bir sıra istiqamətlər üzrə birbaşa hava əlaqəsinin bərpa ediləcəyini də açıqlayıb. Konkret marşrutlar və uçuşların başlanma tarixləri hələlik elan olunmayıb.
Nazirlər Azərbaycan və Ermənistan arasında normallaşma prosesini, regional nəqliyyat və iqtisadi kommunikasiyaların açılması məsələsini də nəzərdən keçiriblər. Lavrov Rusiyanın Bakı ilə İrəvan arasında kommunikasiyaların bərpasına dəstək verməyə hazır olduğunu bildirib.
Bayramov, həmçinin Azərbaycanın Rusiya və Ukrayna arasındakı münaqişədən narahat olduğunu və problemin beynəlxalq hüquq əsasında sülh yolu ilə həllinə çağırdığını deyib.
