Kanadalı reper “Drake”-in UEFA Çempionlar Liqasının finalında “Arsenal”ın qələbəsinə 1 milyon dollar mərc etdiyi iddia olunur.
Sosial şəbəkələrdə yayılan paylaşımlara görə, Drake PSJ-yə qarşı finalda “Arsenal”ın kuboku qazanacağına 1 milyon dollar qoyub. Bundan başqa, reperin “Arsenal”ın 1:0 hesablı qələbəsinə əlavə 500 min dollarlıq mərc etdiyi də bildirilir.
Hələlik bu mərc “Drake”-in rəsmi sosial şəbəkə hesablarında və ya etibarlı beynəlxalq idman mediasında ayrıca təsdiqlənməyib. Buna görə məlumat rəsmi fakt yox, sosial şəbəkələrdə yayılan iddia kimi qiymətləndirilir.
Final öncəsi bukmeker platformalarında PSJ daha üstün tərəf kimi göstərilir. “Stake”in Çempionlar Liqası finalı üçün təqdim etdiyi əmsallara görə, əsas vaxtda PSJ-nin qələbəsinə 2.49, heç-heçəyə 3.30, “Arsenal”ın qələbəsinə isə 3.05 əmsal verilib. Turnirin qalibi bazarında isə PSJ 1.75, “Arsenal” 2.05 əmsalla qiymətləndirilib.
Drake-in idman mərc tarixçəsi uzun müddətdir azarkeşlər arasında ayrıca mövzuya çevrilib. Reper daha əvvəl də futbol və digər idman növlərinə iri məbləğli mərclər edib. Məsələn, 2022-ci ildə o, “Arsenal” və “Barselona”nın qələbəsinə təxminən 600 min dollarlıq kupon paylaşmışdı. Eyni il Dünya Çempionatının finalında Argentinanın Fransa üzərində qələbəsinə 1 milyon dollar qoyduğu bildirilmişdi.
Drake-in iri mərc paylaşımları sosial şəbəkələrdə tez-tez “Drake lənəti” zarafatını gündəmə gətirir. Azarkeşlər arasında yayılan bu memə görə, reperin dəstəklədiyi komanda və ya idmançı bəzən uğursuz nəticə ilə üzləşir. Lakin bu, faktiki idman proqnozu yox, internet zarafatı kimi qəbul olunur.
PSJ – “Arsenal” finalı mayın 30-da Budapeştdəki “Puşkaş Arena”da keçiriləcək. “Arsenal” tarixində ilk Çempionlar Liqası titulunu qazanmağa çalışacaq, PSJ isə ardıcıl ikinci dəfə turnirin qalibi olmaq istəyəcək.
