ABŞ Prezidenti Donald Tramp “Truth Social” hesabında İranın ABŞ bayrağının rəngləri ilə təsvir edildiyi xəritə paylaşıb. Şəklin üzərində “Yaxın Şərqin Birləşmiş Ştatları?” ifadəsi yer alıb. Paylaşım Vaşinqton və Tehran arasında gərgin diplomatik danışıqların davam etdiyi, ABŞ-ın İrana qarşı mümkün yeni zərbələri nəzərdən keçirdiyi bir vaxta təsadüf edib.
“Al Jazeera” yazır ki, Trampın paylaşımı ABŞ və İran arasında “həssas diplomatiya” dövründə edilib. Son günlər tərəflər arasında mümkün razılaşma, Hörmüz boğazı, İranın nüvə proqramı və sanksiyalarla bağlı danışıqların davam etdiyi bildirilir.
“The Daily Beast” isə paylaşımı Trampın “Truth Social”-da yaydığı bir sıra provokativ və süni intellekt üslublu görüntülər kontekstində təqdim edib. Nəşr qeyd edir ki, bu paylaşımlar ABŞ prezidentinin Nyu-Cersidəki həftəsonu planlarını ləğv edib Vaşinqtonda qalması və İranla bağlı milli təhlükəsizlik müzakirələrinin intensivləşməsi fonunda diqqət çəkib.
Bundan əvvəl Tramp İranla mümkün razılaşmanın şansını “50/50” kimi qiymətləndirmişdi. “New York Post”un məlumatına görə, ABŞ prezidenti diplomatik həllin mümkün olduğunu desə də, razılaşma əldə olunmasa, hərbi variantın gündəmdə qala biləcəyini bildirib.
Paylaşım sosial şəbəkələrdə geniş müzakirə yaradıb. Tənqidçilər bunu İrana qarşı siyasi-psixoloji təzyiq mesajı kimi qiymətləndirir, Tramp tərəfdarları isə görüntünü Vaşinqtonun Tehran üzərində maksimum təzyiq strategiyasının simvolik ifadəsi kimi təqdim edirlər. Ağ Ev isə paylaşımın konkret diplomatik və ya hərbi qərar anlamına gəlib-gəlmədiyi barədə ayrıca izah verməyib.
