Rusiya Prezidentinin köməkçisi Yuri Uşakov Ermənistan hakimiyyətini Qərblə yaxınlaşma fonunda “iki stulda oturmaq” siyasətini davam etdirməkdə ittiham edib. O, bu fikri İrəvanda keçirilən son tədbirləri, o cümlədən Ermənistan və Böyük Britaniya arasında strateji tərəfdaşlıq haqqında bəyannamənin imzalanmasını şərh edərkən səsləndirib.
Bu barədə “Sputnik Armenia” məlumat yayıb.
Uşakov Vladimir Putinlə Ermənistanın Baş naziri Nikol Paşinyan arasında apreldə Moskvada keçirilmiş danışıqları xatırladaraq bildirib ki, həmin görüşdə “bütün nöqtələr qoyulub”. Onun sözlərinə görə, buna baxmayaraq, İrəvan hələ də balanslaşdırma siyasətindən imtina etmir. Kremlin nümayəndəsi bu yanaşmanın Rusiya-Ermənistan münasibətlərinin inkişafına zərər vurduğunu deyib.
Moskvanın narazılığı Ermənistanın son dövrlərdə Qərblə əlaqələri genişləndirməsi fonunda səslənir. Mayın 4-də Ermənistanın Baş naziri Nikol Paşinyan və Böyük Britaniyanın Baş naziri Kir Starmer iki ölkə arasında strateji tərəfdaşlıq haqqında birgə bəyannamə mübadilə ediblər. Ermənistan hökumətinin məlumatına görə, sənəd ikitərəfli münasibətlərdə yeni mərhələnin başlanğıcı kimi təqdim olunub.
Bundan əlavə, Ermənistan mayın əvvəlində İrəvanda Avropa Siyasi Birliyinin sammitinə və Aİ-Ermənistan sammitinə ev sahibliyi edib. Bu tədbirlər Ermənistanın Rusiya orbitindən uzaqlaşaraq Avropa ilə daha sıx inteqrasiyaya yönəldiyi bir dövrdə keçirilib. Aİ sammitində nəqliyyat, enerji və rəqəmsal sahələr üzrə əlaqələrin gücləndirilməsi məsələləri də müzakirə olunub.
Son illərdə Ermənistan-Rusiya münasibətlərində gərginlik artıb. İrəvan 2023-cü ildə Beynəlxalq Cinayət Məhkəməsinə qoşulub, 2024-cü ildə isə Rusiyanın rəhbərlik etdiyi KTMT-də iştirakını dayandırdığını bəyan edib. Bununla belə, Ermənistan hələ də Avrasiya İqtisadi İttifaqının üzvüdür və bu, ölkənin xarici siyasətdə balans axtarışını davam etdirdiyini göstərir.
