Roma Papası XIV Leo ABŞ prezidenti Donald Trampın sərt hücumlarından sonra ona birbaşa cavab verib. Pontifik Əlcəzairə uçarkən jurnalistlərə bildirib ki, onun mesajını Trampın etdikləri ilə eyni tərəziyə qoymaq “İncilin mahiyyətini başa düşməmək” olar. O, əlavə edib ki, bunu eşitmək onun üçün üzücüdür, amma kilsənin müasir dünyadakı missiyası hesab etdiyi işi davam etdirəcək.
Xəbəri “Associated Press”-ə istinadən MSNews.az verir.
Papa XIV Leo vurğulayıb ki, o, Trampla debat aparmaq niyyətində deyil və söylədikləri heç kimə hücum məqsədi daşımayıb. Onun sözlərinə görə, İncilin mesajı aydındır: insanları sülh yaratmağa, barışıq körpüləri qurmağa və mümkün olduqca müharibədən qaçmağa çağırır. Pontifik müsahibə zamanı “mən siyasətçi deyiləm, İncil haqqında danışıram” deyərək kilsənin sülh, dialoq və çoxtərəflilik xəttini davam etdirəcəyini bildirib.
Ən diqqətçəkən məqamlardan biri də onun “Mənim Tramp administrasiyasından heç bir qorxum yoxdur” bəyanatı olub. Papa Leo bu sözlərlə Trampın əvvəlki hücumlarına baxmayaraq geri çəkilməyəcəyini göstərib.
Bu açıqlamalar Trampın Papa Leonu “cinayətkarlıq məsələsində zəif” və “xarici siyasətdə bərbad” adlandırmasından dərhal sonra gəlib. Qarşıdurmanın əsas səbəbi pontifikin İran müharibəsi, zorakılıq və ABŞ administrasiyasının bəzi siyasətləri ilə bağlı tənqidi mövqeyidir.
Papa Leo hazırda 10 günlük Afrika turuna başlayıb və Əlcəzair bu səfərin ilk dayanacağıdır. Bu turne çərçivəsində o, Əlcəzair, Kamerun, Anqola və Ekvatorial Qvineyaya səfər edəcək.
