“CNN”-in yaydığı məlumata görə, haker Çin dövlətinə bağlı superkompüter mərkəzini sındırdığını və 10 petabaytdan çox həssas məlumatı ələ keçirdiyini iddia edir. Məlumatlarda oğurlanan fayllar arasında müdafiə sənədləri, raket sxemləri, hərbi və aerokosmik tədqiqat materiallarının olduğu bildirilir. Əgər bu təsdiqlənsə, Çində indiyədək məlum olan ən iri məlumat oğurluqlarından biri sayıla bilər.
Xəbəri “Geo News”-a istinadən MSNews.az verir.
İddialara görə, sızma Tianjindəki Milli Superkompüter Mərkəzi ilə bağlıdır. “Computing”-in məlumatında bu mərkəzin Çin üzrə təxminən 6 min müştəriyə, o cümlədən elm və müdafiə strukturlarına infrastruktur xidməti göstərdiyi qeyd olunur. Hakerin paylaşdığı nümunələrdə daxili qovluqlar, giriş məlumatları, texniki təlimatlar və silah sınaqları ilə əlaqəli sxemlərin göründüyü bildirilir.
Məlumatların satışa çıxarılması iddiası da var. “Geo News”-un “CNN”-ə istinadən yazdığına görə, “FlamingChina” adlı hesab fevralın 6-da “Telegram”-da oğurlandığı deyilən məlumatın nümunəsini paylaşıb və daha böyük arxivi satmağa çalışır. Həmin mənbə bu məlumatların müstəqil şəkildə tam təsdiqlənmədiyini ayrıca vurğulayır.
Kibertəhlükəsizlik mütəxəssisləri isə sızmanın tam həcmdə təsdiqlənməsinin çətin olduğunu desələr də, təqdim olunan nümunələrin real görünə biləcəyini bildirirlər. “Computing”-in məqaləsində ekspertlərin fikrinə görə, belə həcmdə məlumatın aylar boyunca yavaş-yavaş çıxarılması və bunun uzunmüddətli, yaxşı planlaşdırılmış əməliyyat olması ehtimalı var. “NetAskari” də sızan nümunələrə baxaraq ən azı “sample” faylların orijinal təsir bağışladığını, amma 10 petabaytlıq tam həcmin hələ də ayrıca sübut olunmadığını yazır.
Çin tərəfi hələlik bu iddianı açıq şəkildə təsdiqləməyib. “Geo News”-un məlumatına görə, Çin Elm və Texnologiya Nazirliyi mövzu ilə bağlı şərh verməyib.
