İranın “Defa Press” agentliyi SEPAH-la əlaqəli “Fatihin” bölməsinin komandiri, briqada generalı Məhəmməd Əli Fəthəlizadənin öldürüldüyünü yazıb. Agentliyin məlumatına görə, o, çərşənbə günü “düşmən hücumu” nəticəsində həlak olub. Bu xəbər daha sonra “Asr Iran” da daxil olmaqla digər İran nəşrlərində də eyni mənbəyə istinadən yayılıb.
Hazırda bu ölüm xəbəri əsasən İran mənbələrinə söykənir. Aparıcı beynəlxalq agentliklərdə Məhəmməd Əli Fəthəlizadənin ölümü ilə bağlı ayrıca, müstəqil təsdiqə rast gəlinmir.
“Fatihin” bölməsi barədə açıq mənbələrdə məhdud məlumat var. ABŞ Müdafiə Kəşfiyyat İdarəsinin əvvəlki hesabatına görə, “Fatehin” Bəsic xüsusi təyinatlı bölmələrindən biridir və bu qüvvələrin bir hissəsi daha əvvəl Suriyada da SEPAH Quru Qoşunlarına dəstək üçün istifadə olunub. Bu baxımdan, bölməni xüsusi təyinatlı xətt kimi təsvir etmək mümkündür, amma onun strukturu və indiki statusu barədə tam müstəqil detallar açıq deyil.
