Yaponiyada insanlar gündəlik həyatın stresindən uzaqlaşmaq və mənəvi rahatlıq tapmaq üçün müxtəlif sənət növlərinə müraciət edirlər. Bu sahədə xüsusilə diqqət çəkən və meditativ xüsusiyyətləri ilə seçilən “Dorodanqo” sənəti, torpaqla birbaşa təmas üzərində qurulur.
“Dorodanqo” sənətində əsas məqsəd, torpağı ovuc arasında yoğuraraq hamar və parlaq top formaları yaratmaqdır. Proses əvvəlcə torpağın kiçik daş və sərt hissəciklərdən təmizlənməsi ilə başlayır. Sonra nəm qum diqqətlə yoğrularaq istədiyiniz forma verilir. Bu mərhələ təxminən 20-30 dəqiqə davam edir.
Hazırlanan top formalı palçıq fiqurlar xüsusi plastik paketlərdə saxlanaraq qurudulur. Qurudulma prosesi, xüsusilə günəş şüaları altında, onların formalarını daha da möhkəm və parlaq etməyə kömək edir. Təxminən 20 dəqiqə günəş işığı altında qurudulduqdan sonra fiqurlar yağlı boyalarla bəzədilir və üzərinə müxtəlif naxışlar tətbiq edilə bilər.
Yaponiyada bu fiqurlar yalnız dekorativ obyekt deyil, həm də meditasiya və stres azaldıcı vasitə hesab olunur. “Dorodanqo” ilə məşğul olmaq, torpaqla birbaşa təmasda olmaqla həm zehni rahatlıq, həm də yaradıcı ifadə imkanı yaradır.
