Türkiyə Silahlı Qüvvələrinin ölkə sərhədlərindən kənarda 11 ölkədə, ümumilikdə 133 məntəqədə hərbi mövcudluğunun olduğu bildirilir. Bu məntəqələrə iri hərbi bazalarla yanaşı, kiçik dayaq məntəqələri və müşahidə postları da daxildir.
MSNews.az xəbər verir ki, Türkiyənin “Ensonhaber” nəşri ölkənin Suriya, İraq, Liviya, Qətər, Somali, Livan, Bosniya və Herseqovina, Kosovo, Albaniya, Azərbaycan və Şimali Kiprdə hərbi qüvvələrinin yerləşdiyini yazıb. Nəşr Türkiyəni xaricdəki hərbi məntəqələrinin sayına görə ABŞ-dən sonra ikinci ölkə kimi təqdim edib.
Türkiyənin xaricdəki hərbi fəaliyyətinin xarakteri ölkələr üzrə fərqlənir. Məsələn, Qətər və Somalidə Türkiyənin hərbi komandanlıq və təlim strukturları fəaliyyət göstərir. Bosniya və Herseqovina kimi ölkələrdə isə Türkiyə hərbçiləri beynəlxalq missiyalar çərçivəsində xidmət edirlər.
133 məntəqənin hamısını müstəqil hərbi baza hesab etmək doğru olmaz. Açıq mənbələrdə bu rəqəmin hansı meyarlarla hesablandığını göstərən vahid rəsmi siyahı təqdim olunmur. Buna görə də Türkiyənin xaricdəki hərbi bazaların sayına görə dünyada ikinci olması barədə məlumatı təsdiqlənmiş beynəlxalq sıralama kimi təqdim etmək mümkün deyil.
