Türkiyə millisi 2026-cı il dünya çempionatının Avropa zonası üzrə pley-off finalında Kosovo üzərində 1:0 hesablı qələbə qazanaraq mundiala vəsiqə əldə edib. Priştinada keçirilən görüşün taleyini 53-cü dəqiqədə Kerem Aktürkoğlunun vurduğu qol həll edib. Bu nəticə ilə Vinçenzo Montellanın komandası 2002-ci ildən bəri ilk dəfə dünya çempionatının final mərhələsində iştirak hüququ qazanıb.
Kosovo-Türkiyə duelinin qalibi “D” qrupunda ABŞ, Paraqvay və Avstraliya ilə birlikdə yer alacaqdı. Türkiyə bu qələbə ilə həmin qrupa düşən komanda olub və beləliklə, 24 illik mundial həsrətinə son qoyub.
Kosovo üçün bu oyun tarixi əhəmiyyət daşıyırdı, çünki komanda ilk dəfə dünya çempionatına yüksəlmək şansını qazanmışdı. Lakin Türkiyə həlledici matçda minimum hesablı qələbə ilə daha təcrübəli tərəf olduğunu göstərdi.
