ABŞ Prezidenti Donald Trampın sosial media şirkəti “Trump Media & Technology Group” “Truth Social” platformasındakı nüfuzlu hesabların paylaşımlarına sürətli çıxış verən ödənişli “Truth API” xidmətini istifadəyə verib.
MSNews.az xəbər verir ki, avqustun 1-də işə salınan sistem banklar, investisiya şirkətləri və alqoritmik ticarətlə məşğul olan qurumlar üçün nəzərdə tutulub. Xidmət Donald Trampın hesabı da daxil olmaqla platformanın ən nüfuzlu 10 hesabından yayımlanan paylaşımları müştərilərə adi “Truth Social” bildirişlərindən daha sürətli çatdırır.
Bu barədə “Reuters” məlumat yayıb.
“Truth API” sutka ərzində fasiləsiz işləyir və 2022-ci ildən etibarən yayımlanan paylaşımların arxivinə çıxış verir. Şirkət xidmətin istifadəyə verilməsindən əvvəl artıq ilk müştərilərlə razılıq əldə olunduğunu, lakin onların adlarının açıqlanmadığını bildirib.
Şirkətin mövqeyinə görə, paylaşımlar ödənişli müştərilər və ictimaiyyət üçün eyni vaxtda dərc olunur. Bununla belə, birbaşa məlumat axınına qoşulan şirkətlər paylaşımları adi istifadəçilərdən daha tez qəbul və emal edə bilirlər. “Associated Press” yazır ki, bu sürət fərqi xüsusilə millisaniyələr ərzində əməliyyat aparan yüksək tezlikli treyderlər üçün maliyyə üstünlüyü yarada bilər.
Xidmət üçün aylıq ödənişin bəzi müştərilər üçün 100 min dollara qədər çata biləcəyi bildirilir. “Trump Media” rəhbərliyi “Truth API”nin şirkət üçün davamlı və əhəmiyyətli gəlir mənbəyinə çevriləcəyini gözləyir. Bu, şirkətin məlumatların lisenziyalaşdırılması bazarına ilk girişi hesab olunur.
Trampın “Truth Social” hesabını təxminən 13 milyon istifadəçi izləyir. Onun gömrük tarifləri, ticarət məhdudiyyətləri, enerji siyasəti və ayrı-ayrı şirkətlərlə bağlı paylaşımları daha əvvəl səhmlərin, valyutaların və əmtəələrin qiymətlərinə ciddi təsir göstərib. Məhz bu səbəbdən Trampın paylaşımlarını mümkün qədər sürətli əldə etmək maliyyə şirkətləri üçün kommersiya dəyəri daşıyır.
Bununla belə, Tramp hər paylaşımına görə birbaşa ödəniş almır. Xidmətdən əldə olunan gəlir “Trump Media” şirkətinə daxil olacaq. Trampın övladlarının idarə etdiyi etimad fondu isə şirkətin səhmlərinin təxminən 41 faizinə sahib olduğundan, ABŞ prezidenti biznesin gəlirlərindən dolayı şəkildə faydalana bilər.
Demokrat senatorlar Elizabet Uorren və Adam Şiff xidmətin adi investorlarla iri maliyyə şirkətləri arasında qeyri-bərabərlik yarada biləcəyini bildirərək ABŞ Qiymətli Kağızlar və Birja Komissiyasından məsələni araşdırmağı istəyiblər. “Trump Media” isə ittihamları rədd edərək sistemin yalnız açıq şəkildə yayımlanan məlumatları çatdırdığını vurğulayıb.
