ABŞ Prezidenti Donald Tramp Vaşinqtondakı “Washington Hilton” hotelində keçirilən Ağ Ev Müxbirləri Assosiasiyasının illik ziyafətində baş verən silahlı insidentdən sonra Ağ Evdə mətbuat konfransı keçirib. Tramp hadisəni “gözlənilməz” adlandırıb və Məxfi Xidmət əməkdaşlarının sürətli müdaxiləsini yüksək qiymətləndirib.
Tramp mətbuat konfransında hücumçunu “xəstə insan” və “təkbaşına hərəkət edən şəxs” kimi xarakterizə edib. “The Guardian”ın məlumatına görə, prezident bildirib ki, şübhəli şəxs bal zalının qapılarına yaxınlaşa bilməyib və lobbi ərazisində zərərsizləşdirilib. Tramp həmçinin hadisənin siyasi motivli olub-olmadığını demək üçün hələ tez olduğunu qeyd edib.
ABŞ Prezidenti hadisənin İranla bağlı müharibə mövqeyinə təsir etməyəcəyini də vurğulayıb. “Arab News”un yazdığına görə, Tramp bildirib ki, bu insident onu “İranda müharibədə qalib gəlməkdən” çəkindirməyəcək. O, hadisənin İranla əlaqəli olduğuna dair indiki mərhələdə ciddi işarə görmədiyini desə də, “heç vaxt bilmək olmaz” fikrini səsləndirib.
Tramp çıxışında ziyafətin həmin gecə davam etdirilməsini istədiyini, lakin təhlükəsizlik protokoluna görə hotelin tərk edilməsinin tələb olunduğunu bildirib. Prezident tədbirin 30 gün ərzində yenidən təşkil olunacağına ümid etdiyini deyib. İnsidentdən sonra ABŞ-da yüksək səviyyəli siyasi tədbirlərin təhlükəsizliyi yenidən müzakirə mövzusuna çevrilib.
