ABŞ Prezidenti Donald Tramp təhlükəsizlik imkanları ilə bağlı müzakirələrə baxmayaraq, sentyabrın 12-də İrlandiyaya Qətərin ABŞ-yə hədiyyə etdiyi “Boeing 747-8” təyyarəsi ilə uçmağı planlaşdırır.
MSNews.az xəbər verir ki, bu, iyulda Türkiyədə keçirilən NATO sammitindən sonra həmin təyyarənin Tramp tərəfindən ilk xarici səfərdə istifadəsi olacaq. Bu barədə “The Washington Post” və “CBS News” ABŞ rəsmilərinə istinadən məlumat yayıb.
Trampın İrlandiyaya sentyabrın 12-də çatması, Prezident Ketrin Konnolli və Baş nazir Mixel Martinlə görüşməsi, daha sonra isə Klar qraflığındakı Dunbeq kurortuna yollanması planlaşdırılır. O, burada “Irish Open” qolf turnirində iştirak edəcək. “RTÉ” səfərin iki gün davam edəcəyini bildirir.
Təyyarənin təhlükəsizliyi ilə bağlı suallar iyulda Trampın Ankarada keçirilən NATO sammitinə səfəri zamanı daha da artıb. ABŞ kəşfiyyatı prezident təyyarəsinə qarşı mümkün İran hücumu barədə məlumat aldıqdan sonra Tramp Türkiyədən gizli şəkildə başqa təyyarə ilə çıxarılıb. “Reuters” və “Washington Post”un məlumatına görə, prezident əvvəlcə köhnə “Air Force One”a mindiyi görüntüsü yaradıldıqdan sonra iaşə avtomobili vasitəsilə ABŞ Hərbi Hava Qüvvələrinin C-32A təyyarəsinə keçirilib.
Tramp sonradan Qətərdən alınan təyyarənin daha geniş təhlükəsizlik və texniki imkanlarla “maksimum səviyyəyə çatdırılacağını” bildirib. Ağ Ev həmin modernizasiyanın payızda başlanacağını və təxminən bir ay davam edəcəyini açıqlamışdı. Lakin sentyabrın əvvəlinədək işlərin konkret başlanma tarixi elan edilməyib. “Reuters” yazır ki, əlavə modernizasiyanın məhz hansı sistemləri əhatə edəcəyi də məxfi saxlanılır.
“The Washington Post”un məlumatına görə, ABŞ Qətərin verdiyi təyyarənin prezident istifadəsinə uyğunlaşdırılmasına artıq təxminən 400 milyon dollar xərcləyib. Administrasiya əlavə təhlükəsizlik işlərinin nə qədər başa gələcəyini açıqlamayıb.
Qətər tərəfindən 2025-ci ildə ABŞ-yə verilən “Boeing 747-8”-in özünün də təxminən 400 milyon dollar dəyərində olduğu bildirilir. Təyyarə yeni nəsil VC-25B prezident təyyarələri hazır olana qədər müvəqqəti “Air Force One” kimi istifadə olunur. “Associated Press” yeni prezident təyyarələrinin ən azı 2028-ci ilədək hazır olmayacağını yazır.
Ağ Ev isə təhlükəsizliklə bağlı narahatlıqları yumşaltmağa çalışır. Administrasiya rəsmisi “Washington Post”a bildirib ki, prezidentin daşınması üçün “təhlükəsiz, etibarlı və davamlı imkan” təmin olunur və təhlükəsizlik tədbirləri ehtiyaca uyğun daim yenilənir.
