Britaniyanın nüfuzlu “The Economist” jurnalı ABŞ Prezidenti Donald Trampın miqrasiya siyasətini tənqid edərək administrasiyanın ölkəni təkcə qanunsuz miqrantlar üçün deyil, qanuni yollarla ABŞ-a gəlmək istəyən tələbələr, mütəxəssislər və işçilər üçün də daha qapalı hala gətirdiyini yazıb. Məqalə “The Unwelcoming States of America” — “Qonaqpərvər olmayan Amerika Birləşmiş Ştatları” başlığı ilə dərc olunub. Nəşrin əsas tezisi budur ki, Tramp ölkənin demoqrafik trayektoriyasını dəyişməyə çalışmaqla uzunmüddətli perspektivdə ABŞ-ı zəiflədə bilər.
“The Economist” qeyd edir ki, Tramp dəfələrlə qanuni miqrasiyanı dəstəklədiyini söyləsə də, administrasiyanın praktiki addımları yüksək ixtisaslı xaricilərin ABŞ-da təhsil və işləməsinə imkan verən kanalları da məhdudlaşdırır. Jurnal bunu ABŞ-ın tarixən sahib olduğu əsas üstünlüklərdən birinin — dünyanın müxtəlif ölkələrindən istedadlı insanları özünə cəlb etmək qabiliyyətinin — zəiflədilməsi kimi qiymətləndirir.
Bu tənqid Tramp administrasiyasının qanuni miqrasiya ilə bağlı yeni məhdudiyyətləri fonunda səslənir. “Associated Press” yazır ki, Dövlət Departamenti konsulluq əməkdaşlarının yeni qaydalar üzrə hazırlanması üçün bütün dünyada immiqrant vizaları üzrə görüşləri müvəqqəti dayandırıb. Eyni zamanda administrasiya ABŞ-a turist və biznes vizası ilə daxil olub sonradan sığınacaq istəyən 200 minədək şəxsin vizasını ləğv etməyə hazırlaşır.
Xarici tələbələr üçün də qaydalar sərtləşdirilib. “Reuters”-in məlumatına görə, iyulda qəbul edilən yeni qayda tələbə və mübadilə proqramı vizalarının müddətini əksər hallarda maksimum dörd illə məhdudlaşdırıb. Daha uzun təhsil alan tələbələr bundan sonra ayrıca uzadılma üçün müraciət etməli olacaqlar. Administrasiya dəyişiklikləri milli təhlükəsizlik, miqrasiya nəzarəti və vizaların sui-istifadəsinin qarşısının alınması ilə əsaslandırır.
“The Economist” isə məsələyə iqtisadi və demoqrafik prizmadan yanaşır. Nəşrin mövqeyinə görə, əhalinin yaşlandığı və doğum səviyyəsinin aşağı olduğu şəraitdə miqrasiyanın azalması əmək bazarının böyüməsini zəiflədə, innovasiya və sahibkarlıq üçün lazım olan xarici istedadın rəqib ölkələrə yönəlməsinə səbəb ola bilər. Jurnal buna görə sərhəd nəzarətinin gücləndirilməsi ilə qanuni və yüksək ixtisaslı miqrasiyanın məhdudlaşdırılmasını bir-birindən ayırmağın vacib olduğunu düşünür.
Sərtləşən siyasətin ABŞ-ın xaricdəki imicinə təsiri turizm sektorunda da müzakirə olunur. “Financial Times”-ın məlumatına görə, 2025-ci ildə ABŞ-a beynəlxalq səfərlər 4,2% azalıb. Nəşrin istinad etdiyi ekspertlər bunda sərt viza və sərhəd siyasəti ilə yanaşı, ABŞ-a səfərlə bağlı xaricdə formalaşan mənfi təsəvvürlərin də rol oynadığını bildirirlər.
Bununla belə, Tramp administrasiyası siyasətinin məqsədinin ABŞ-ı xaricilərə bağlamaq deyil, qanunsuz miqrasiyanı azaltmaq, viza qaydalarının icrasını sərtləşdirmək və milli təhlükəsizliyi gücləndirmək olduğunu bildirir. “The Economist”in ABŞ-ın daha “qonaqpərvər olmayan” ölkəyə çevrildiyi barədə qənaəti isə nəşrin redaksiya mövqeyi və siyasi-iqtisadi qiymətləndirməsidir.
