İranın paytaxtı Tehran səmasında çəkildiyi bildirilən müəmmalı işıqların videosu sosial şəbəkələrdə geniş yayılıb. Görüntülərdə gecə səmasında işıqlanan bir obyekt görünür. Onun nə olduğu isə hələlik müəyyən edilməyib.
MSNews.az xəbər verir ki, “Əl-Cəzirə” sentyabrın 21-də görüntüləri yayımlayaraq obyektin mənşəyinin İran rəsmiləri tərəfindən açıqlanmadığını bildirib. Sosial şəbəkə istifadəçiləri bunun dron, təyyarə və ya LED işıqları ilə təchiz olunmuş uçurtma ola biləcəyini ehtimal edirlər. Bu versiyalardan heç biri təsdiqlənməyib.
Video Tehranda 1976-cı il sentyabrın 19-da baş vermiş və naməlum uçan obyektlə bağlı məlumatların yayıldığı hadisənin 50-ci ildönümünə təsadüf etdiyi üçün əlavə maraq doğurub. Həmin vaxt şəhər sakinləri səmada qeyri-adi parlaq obyekt gördüklərini bildirmiş, İran Hərbi Hava Qüvvələrinin iki qırıcı təyyarəsi isə onu araşdırmaq üçün havaya qalxmışdı.
ABŞ-nin sonradan məxfiliyi aradan qaldırılmış kəşfiyyat sənədində qırıcıların ekipajlarının obyektə yaxınlaşarkən rabitə və bəzi bort cihazlarında nasazlıq yaşadıqları qeyd olunur. Sənəd həmin dövrdə verilmiş məlumatları əks etdirir və obyektin mənşəyini müəyyənləşdirmir.
Hazırda yayılan videonun 1976-cı ildəki hadisə ilə əlaqəsi barədə heç bir sübut yoxdur. Yeni görüntülərdəki obyektin ölçüsü, uçuş hündürlüyü və mənşəyi müstəqil şəkildə təsdiqlənməyib.
