Suriyanın Hələb vilayətində hərbi sursat anbarında baş verən silsilə partlayışlar nəticəsində 4 nəfər xəsarət alıb. Hadisə yerinin yaxınlığındakı sakinlər təxliyə edilib, təhlükəsizlik məqsədilə əraziyə aparan yollar bağlanıb. Bu, sentyabr ayı ərzində Suriyada hərbi sursat anbarlarında qeydə alınan dördüncü oxşar hadisədir.
MSNews.az xəbər verir ki, hadisə sentyabrın 21-də səhər saatlarında Hələb şəhərinin cənubundakı Əl-Eys yaşayış məntəqəsi yaxınlığında baş verib. “Reuters” agentliyinin məlumatına görə, partlayışlar təxminən bir saat davam edib. Yaxınlıqdakı kəndlərdə bəzi evlərin qapı və pəncərələri zədələnib.
Suriyanın Fövqəladə Hallar və Fəlakətlərin İdarə Edilməsi Nazirliyinin açıqlamasına əsasən, xəsarət alanlardan biri qəlpə yarası alıb, iki nəfər tüstüdən təsirlənib, daha bir nəfər isə ərazidən uzaqlaşmağa çalışarkən yol-nəqliyyat hadisəsində yaralanıb. Xilasetmə qrupları yaxınlıqdakı üç ailəni təxliyə ediblər.
Təhlükəsizlik qüvvələri hadisə yerinə aparan yolları bağlayıb. Xilasedicilər partlayış zamanı ətrafa səpələnmiş, lakin partlamamış sursatların aşkar edilərək zərərsizləşdirilməsi üzərində işləyirlər.
“Reuters”in məlumatına görə, 2024-cü ilin dekabrından bəri Suriyada hərbi sursatların saxlanıldığı obyektlərdə azı 16 oxşar partlayış hadisəsi qeydə alınıb. Rəsmilər əvvəlki hadisələrin bəzilərini yanğın, saxlanma şəraiti və köhnəlmiş sursatlarla əlaqələndiriblər. Əl-Eysdəki partlayışların səbəbi isə hələ müəyyən edilməyib; Suriya Müdafiə Nazirliyi araşdırma aparıldığını açıqlayıb.
