Böyük Britaniyanın sabiq baş naziri Kir Starmer vəzifəsindən istefa verdikdən bir neçə saat sonra Şimali Londondakı pabda yaxınları və keçmiş hökumət əməkdaşları ilə birlikdə görüntülənib.
MSNews.az xəbər verir ki, “Evening Standard” Starmerin yeni baş nazir Endi Börnemə hakimiyyəti təhvil verdikdən sonra paba getdiyini yazıb. Məclisdə sabiq maliyyə naziri Reyçel Rivz və Starmerin bir sıra keçmiş əməkdaşları da iştirak ediblər.
Yayılan fotolarda Starmerin əlində pivə bokalı ilə pabdan çıxması, Rivzin isə digər qonaqlarla söhbət etməsi görünür. “The Sun” toplantının Starmer üçün qeyri-rəsmi vida mərasimi xarakteri daşıdığını bildirib. Daha sonrakı məlumatlara görə, məclisə onun ailə üzvləri, yaxın dostları və Dauninq-stritdə çalışmış əməkdaşları da qatılıblar.
Starmer iyulun 20-də Bukingem sarayında Kral III Çarlza istefasını təqdim edib. Bundan sonra Leyboristlər Partiyasının yeni lideri Endi Börnem hökuməti formalaşdırmaq üçün kraldan rəsmi mandat alıb və Böyük Britaniyanın baş naziri vəzifəsinə başlayıb. Bu dəyişiklik Britaniya hökumətinin rəsmi səhifəsində də təsdiqlənib.
Reyçel Rivz yeni hökumətdə yer almayacağını açıqlayıb. “Reuters” onun Börnem hökumətinə uğurlar arzuladığını və Leyborist hökumətini parlamentdən dəstəkləməyə davam edəcəyini bildirib. Rivzə müdafiə naziri postunun təklif olunması barədə xəbərlər yayılsa da, bu məlumat hələlik rəsmi mənbələr tərəfindən təsdiqlənməyib.
Yeni hökumətdə maliyyə naziri vəzifəsinə Con Hili, müdafiə naziri postuna isə Ves Stritinq təyin olunub. Börnem ilk kabinetini formalaşdırarkən Starmer dövrünün bir sıra yüksəkvəzifəli şəxslərini hökumətdən kənarda saxlayıb.
