Sudanın Şimali Darfur bölgəsində, Tavila qəsəbəsində məcburi köçkünlərin qaldığı düşərgədə yanğın baş verib və ən azı 2 nəfər həyatını itirib.
“Sudan Tribune”-nun verdiyi məlumata görə, yanğın Hilla Naima bölgəsində başlayaraq möhkəm olmayan materiallardan inşa edilmiş sığınacaqlardan ibarət onlarla evi kül edib. Tavila Fövqəladə Hallar İdarəsi rəsmisi Yahya İbrahim bildirib ki, ölənlərdən biri 12 yaşındadır. İbrahim, bölgədə çox sayda ailənin evsiz qaldığını və humanitar vəziyyətin ağırlaşdığını vurğulayıb.
Tavila, xüsusilə 26 oktyabr 2025-ci ildə ordu ilə qarşıdurmada iştirak edən Çevik Dəstək Qüvvələrinin (ÇDQ) Əl Faşir şəhərini ələ keçirməsindən sonra, şiddətdən qaçan mülki əhali üçün əsas sığınacaq mərkəzi olmuşdu.
Sudan, 15 aprel 2023-cü ildən bəri ordu ilə ÇDQ arasında davam edən şiddətli qarşıdurmalarla üzləşir. Bu münaqişələr nəticəsində on minlərlə insan həyatını itirib və təxminən 13 milyon nəfər yerindən didərgin salınıb. ÇDQ ölkənin 18 əyalətindən 5-nin mərkəzini ələ keçirmiş, Sudan ordusu isə qalan 13 əyalətin böyük hissəsində və paytaxt Xartumda nəzarəti saxlayır.
Darfur bölgəsinin böyük hissəsini idarə edən ÇDQ, 2025-ci ilin oktyabrında Şimali Darfurun mərkəzi Faşir şəhərinə daxil olmuş və ciddi zorakılıqlar həyata keçirmişdi.
