“Reuters”-in əldə etdiyi məlumata görə, silahlı kürd separatçı qruplar son günlər İraq ərazisindən İrana keçməyə cəhd göstəriblər.
Məsələ ilə tanış olan üç mənbə bildirib ki, bu addım Tehranda etiraz aksiyalarına qarşı sərt tədbirlərin görüldüyü bir dövrdə xarici qüvvələrin mövcud qeyri-sabitlikdən yararlanmaq istədiyini göstərir.
Mənbələr arasında yüksək rütbəli iranlı rəsmi də olub və hamısı anonimlik şərti ilə danışıb. Onların sözlərinə görə, Türkiyənin kəşfiyyat xidməti son günlərdə kürd silahlı dəstələrinin sərhədi keçməsi barədə İran İslam İnqilabı Keşikçiləri Korpusunu xəbərdar edib.
İranlı rəsmi bildirib ki, Keşikçilər Korpusu həmin silahlı qruplarla toqquşub və bu qruplar etirazlardan istifadə edərək ölkədə sabitliyi pozmağa çalışıblar. Qeyd olunur ki, İnqilab Keşikçiləri İranda əvvəlki iğtişaşların yatırılmasında da əsas rol oynayan elit hərbi qüvvədir. Türkiyənin Milli Kəşfiyyat Təşkilatı məsələ ilə bağlı dərhal şərh verməyib, Ankaradakı prezident administrasiyası da sorğuları cavabsız qoyub. Şimal İraqdakı kürd silahlılarını terrorçu hesab edən Türkiyə son günlər İrana hər hansı xarici müdaxilənin regionda böhranları daha da dərinləşdirəcəyini bəyan edib.
İranlı rəsminin sözlərinə görə, döyüşçülər İraq və Türkiyə ərazilərindən göndərilib və Tehran həmin ölkələrdən silahlı şəxslərin və silahların İrana ötürülməsinin dayandırılmasını tələb edib. Digər tərəfdən, hüquq müdafiə təşkilatlarından biri bildirib ki, ruhani hakimiyyətinə qarşı etiraz edən və ABŞ tərəfindən təşviq edildiyi iddia olunan nümayişçilərə qarşı son günlər həyata keçirilən sərt əməliyyatlar nəticəsində 2600 nəfər həlak olub, Vaşinqton isə vəziyyətlə bağlı müdaxilə ilə hədələyib.
