ABŞ Senatının avqustun 7-də 86 lehinə, 11 əleyhinə səslə qəbul etdiyi Rusiyaya qarşı geniş sanksiyalar paketi Nümayəndələr Palatasında artan müqavimətlə üzləşib.
MSNews.az xəbər verir ki, qanun layihəsinin noyabrın 3-də keçiriləcək aralıq seçkilərədək səsverməyə çıxarılması ehtimalı azalır. “Bloomberg” bildirir ki, narahatlıqlar həm respublikaçılar, həm də demokratlar arasında artır.
Söhbət mərhum senator Lindsi Qremin təşəbbüsü ilə hazırlanmış “Lindsey O. Graham Sanctioning Russia and Iran Act of 2026” qanun layihəsindən gedir. Sənəd Rusiyanın yüksək vəzifəli şəxsləri, maliyyə institutları və sanksiyalardan yayınmada istifadə olunan strukturlara qarşı əlavə məhdudiyyətlər nəzərdə tutur. Nümayəndələr Palatasına təqdim edilən versiyanın Senatın qəbul etdiyi mətnlə eyni olduğu bildirilir.
Layihənin ən mübahisəli hissələrindən biri prezidentə Rusiyanın neft və qazının ən böyük beş alıcısından idxal olunan mallara 100 faizə qədər tarif tətbiq etmək səlahiyyəti verməsidir. Sənəd həmçinin Rusiyanın enerji sanksiyalarından yayınmasına ən çox kömək edən ölkələrə qarşı analoji tədbirlərin görülməsini nəzərdə tutur. Çin və Hindistan Rusiya enerjisinin əsas alıcıları sırasında yer alır.
“Bloomberg” yazır ki, bəzi respublikaçılar yeni məhdudiyyətlərin dünya neft qiymətlərini və nəticədə ABŞ-da benzinin qiymətini artıra biləcəyindən ehtiyat edirlər. ABŞ Ticarət Palatası və pərakəndə satış sektorunun nümayəndələri də geniş tariflərin istehlakçılar və Vaşinqtonun ticarət tərəfdaşları üçün arzuolunmaz nəticələr yarada biləcəyini bildirirlər.
Demokratların əsas etirazı isə başqa məsələ ilə bağlıdır. Onlar qanun layihəsinin Donald Trampa yeni və geniş tarif səlahiyyətləri verəcəyindən narahatdırlar. Nümayəndələr Palatasının Xarici Əlaqələr Komitəsində aparıcı demokrat Qreqori Miks və digər demokrat qanunvericilər prezidentin Rusiyaya qarşı mövcud sanksiya səlahiyyətlərinin kifayət etdiyini, əlavə tarif səlahiyyətinə ehtiyac olmadığını bildiriblər.
Nümayəndələr Palatasının spikeri Mayk Conson isə sənədin noyabrın 3-də keçiriləcək Konqresə aralıq seçkilərdən əvvəl səsverməyə çıxarılacağına şübhə etdiyini bildirib. Onun sözlərinə görə, qarşıdakı iki ay ərzində Konqres üzvlərinin Vaşinqtonda işləyəcəyi günlərin sayı məhduddur. Buna görə Senatda böyük üstünlüklə qəbul edilən layihənin taleyi ən azı seçkilərədək qeyri-müəyyən qala bilər.
Qanun layihəsinin tərəfdarları isə yeni sanksiyaların Rusiyanın enerji gəlirlərini azaltmaqla Moskvanın Ukraynadakı müharibəni maliyyələşdirmək imkanlarını zəiflədəcəyini bildirirlər. “Reuters”-in məlumatına görə, Ukrayna rəsmiləri də sənədin Nümayəndələr Palatasından keçirilməsi üçün Vaşinqtonda fəal lobbiçilik aparırlar.
