Rusiya hökuməti “Meta Platforms”-a məxsus “WhatsApp” mesajlaşma xidmətini ölkədə tamamilə bloklamağa çalışıb. Bu barədə “WhatsApp” şirkətinin nümayəndəsi çərşənbə günü “Reuters”-ə açıqlama verib.
Moskva öz internet məkanında daha çox nəzarət qurmaq və xarici texnologiya xidmətlərinə olan asılılığı azaltmaq məqsədilə bu addımı atıb. Məhz, buna görə də Rusiya hakimiyyəti yerli istifadəçiləri “MAX” adlı dövlət tərəfindən dəstəklənən mobil tətbiqə yönəltməyə çalışır. Tənqidçilər bu tətbiqi “dövlət müşahidə tətbiqi” adlandıraraq istifadəçi hüquqlarına təhlükə kimi qiymətləndirirlər; dövlət mediası isə bu iddiaları rədd edir.
“WhatsApp” açıqlamasında bildirib ki, bu cəhd 100 milyondan çox Rusiyadakı istifadəçinin təhlükəsiz və məxfi əlaqəsinə ciddi zərbə vurur və şirkət istifadəçiləri əlaqədə saxlamaq üçün əlindən gələni edəcəyini vurğulayıb. Hələlik Rusiyanın qərarına rəsmi münasibət bildirilməyib, lakin Kremlin sözçüsü Dmitri Peskov bildirib ki, “Meta” Rusiya qanunlarına əməl edərsə, “WhatsApp” yenidən ölkədə fəaliyyət göstərə bilər. Əks halda məhdudiyyətlər davam edəcək.
Qeyd edək ki, ötən il Rusiyada “WhatsApp” və “Telegram” kimi messencerlərin bəzi funksiyaları artıq məhdudlaşdırılmışdı; məsələ qanunvericiliyə əməl etməmək, o cümlədən hüquq-mühafizə orqanlarına məlumat verməmək kimi arqumentlərlə əsaslandırılmışdı.
