Rusiya Suriyanın şimal-şərqində yerləşən, Haseke vilayətinə bağlı Kamışlı rayonundakı hərbi bazasından şəxsi heyətini və hərbi texnikasını daşıyır.
Bölgədəki “Anadolu Agentliyi”nin müxbirinin suriyalı hərbi mənbələrə istinadən verdiyi məlumata görə, Rusiya Kamışlıda yerləşən bazadan hərbi yük təyyarələri vasitəsilə əsgərləri və müxtəlif növ hərbi avadanlıqları ərazidən çıxarıb. Mənbələr Rusiyaya məxsus texnika və şəxsi heyətin Suriyanın sahil bölgəsində, Lazkiyə vilayətində yerləşən Hmeymim Hava Bazasına köçürüldüyünü bildirib.
Suriyalı hərbi mənbələr daşınmanın səbəbləri və həcmi ilə bağlı əlavə təfərrüat verməyib. Kamışlıdakı bu hərəkətlilik regionda təhlükəsizlik balansı və Rusiyanın Suriyadakı hərbi mövcudluğunun gələcəyi ilə bağlı sualları yenidən gündəmə gətirib.
