ABŞ Dövlət katibi Marko Rubio ilə Rusiyanın xarici işlər naziri Sergey Lavrov Filippinin paytaxtı Manilada görüşərək Ukrayna müharibəsini və Vaşinqton–Moskva münasibətlərini müzakirə ediblər.
MSNews.az xəbər verir ki, görüş iyulun 23-də ASEAN Regional Forumunun kuluarlarında keçirilib. “Reuters” danışıqların bir saata yaxın davam etdiyini bildirib.
Rusiya Xarici İşlər Nazirliyinin məlumatına görə, Lavrov Moskvanın Ukrayna münaqişəsinin siyasi və diplomatik yolla həllinə hazır olduğunu bir daha bəyan edib. O, Rusiya və ABŞ liderlərinin əvvəlki təkliflərinə sadiq qaldıqlarını bildirib.
ABŞ Dövlət Departamentinin görüşlə bağlı qısa açıqlamasında isə tərəflərin ikitərəfli münasibətləri və Rusiya–Ukrayna müharibəsinin dayandırılması zərurətini müzakirə etdikləri qeyd olunub. Görüşdən sonra konkret razılaşma, atəşkəs planı və ya yeni danışıqlar formatı açıqlanmayıb.
Rubio görüşdən əvvəl Vaşinqtonun münasib fürsət yaranacağı təqdirdə Ukrayna müharibəsinin başa çatmasına yardım etməyə hazır olduğunu bildirmişdi. Onun sözlərinə görə, ABŞ ilə Rusiya arasında ciddi fikir ayrılıqları olsa da, dünyanın ən böyük nüvə silahı arsenalına malik iki dövləti arasında dialoq saxlanılmalıdır. “Associated Press” yazır ki, Vaşinqton son aylarda zəifləyən vasitəçilik təşəbbüslərinin yenidən canlandırılması imkanlarını araşdırır.
Lavrov da görüşdən əvvəl ABŞ Prezidenti Donald Trampın Ukrayna müharibəsinin həllinə yaxınlaşılması barədə son bəyanatlarını Rubio ilə müzakirə etmək istədiyini açıqlamışdı. Bununla yanaşı, tərəflər ABŞ–Rusiya münasibətlərinin normallaşdırılması və mümkün əməkdaşlıq sahələrinə də toxunublar.
Maniladakı görüş Yaxın Şərqdə gərginliyin artdığı və Ukrayna ilə bağlı diplomatik prosesin son aylarda zəiflədiyi bir dövrdə keçirilib. Hələlik danışıqların yeni sülh təşəbbüsünə çevrilib-çevrilməyəcəyi məlum deyil.
