“Qarabağ”ın prezidenti Tahir Gözəl baş məşqçi Qurban Qurbanovun əvvəlki illərdə bəzi uğursuz nəticələrdən sonra klubdan ayrıla biləcəyini bildirdiyini açıqlayıb. Klub rəhbəri həmin vaxtlarda qarşılıqlı etimadı qoruyaraq əməkdaşlığı davam etdirdiklərini deyib.
MSNews.az xəbər verir ki, Tahir Gözəl bu barədə klubun mətbuat xidmətinə müsahibəsində danışıb. O, Qurban Qurbanovun 2008-ci ildən “Qarabağ”a rəhbərlik etdiyini xatırladaraq uzunmüddətli əməkdaşlığın əsasını qarşılıqlı etimadın təşkil etdiyini bildirib.
“Elə məqamlar olub ki, Qurban Qurbanov özü məsuliyyəti üzərinə götürməyə hazır olduğunu və klubdan ayrıla biləcəyini bildirib. Biz isə bir nəticənin və ya uğursuz seriyanın illər ərzində qurulan münasibətləri dağıtmasına imkan verməmişik”, – deyə klub prezidenti qeyd edib.
Gözəlin sözlərinə görə, rəhbərlik çətin dövrlərdə təkcə son oyunların nəticələrini deyil, baş məşqçinin iş prinsipini, kluba münasibətini və uzunmüddətli hədəflərini də nəzərə alıb. O, sabitliyin və qarşılıqlı etimadın “Qarabağ”da formalaşmış idarəetmə modelinin mühüm hissəsi olduğunu vurğulayıb.
Tahir Gözəlin açıqlaması əvvəlki illərdə yaşanmış vəziyyətlə bağlıdır. Qurban Qurbanovun hazırda klubdan ayrılmaq qərarı verdiyi barədə məlumat açıqlanmayıb.
