Fransanın PSJ klubunun azarkeşləri Çempionlar Liqasının yarımfinal mərhələsində “Bavariya” ilə oyundan əvvəl stadionda Napoleon Bonapartın Arkol körpüsü döyüşünü əks etdirən böyük banner nümayiş etdiriblər. Sosial şəbəkələrdə yayılan görüntülərdə pankartın Napoleonun Avropanı fəth etməsi ideyasına işarə etdiyi bildirilib.
MSNews.az xəbəri “One Football” nəşrinə istinadən verir.
Banner 1796-cı ildə baş vermiş Arkol körpüsü döyüşünə istinad edir. Həmin tarixi səhnə fransız rəssamı Horas Vernetin 1826-cı ildə çəkdiyi “Arkol körpüsünü keçərkən” əsərində də təsvir olunub. Əsərdə Napoleon Fransa bayrağı ilə qoşunlarını körpüdən keçməyə çağırır.
Pankartın nümayişi sosial mediada birmənalı qarşılanmayıb. Bəzi istifadəçilər UEFA-nın belə bir tifoya necə icazə verdiyini sual edib, digərləri isə bunu sadəcə Fransa tarixinə və PSJ-nin “Avropanı fəth etmək” iddiasına simvolik istinad kimi qiymətləndirib. Müzakirələrdə “əgər ‘Bavariya’ azarkeşləri Parisin işğalı ilə bağlı nasist Almaniyasına aid obrazdan istifadə etsəydi, reaksiyalar necə olardı?” kimi sərt müqayisələr də aparılıb.
Bununla belə, Napoleonla nasist Almaniyası simvolikasının eyni səviyyədə qiymətləndirilməsi tarixi və hüquqi baxımdan mübahisəlidir. UEFA stadionlarda açıq siyasi, təhqiredici və provokativ mesajlara görə klubları cəzalandıra bilir; məsələn, daha əvvəl “Bavariya” azarkeşlərinin PSJ prezidenti Nasser əl-Xəlaifiyə qarşı pankartına görə klub üzr istəmişdi.
