Norveçin paytaxtı Osloda ABŞ, Ukrayna və Avropa ölkələrinin nümayəndələri arasında Ukraynadakı müharibənin dayandırılmasına yönəlmiş yeni danışıqlar keçirilib. Görüşlərdən sonra ABŞ Prezidentinin xüsusi nümayəndəsi Stiv Vitkoffun əldə olunan təklifləri Rusiya rəhbərliyinə təqdim etmək məqsədilə Moskvaya səfər edəcəyi gözlənilir.
MSNews.az xəbər verir ki, oktyabrın 20-də keçirilən danışıqlarda Ukrayna Prezidenti Volodimir Zelenski, ABŞ Prezidentinin xüsusi nümayəndəsi Stiv Vitkoff, Norveçin Baş naziri Yonas Qar Störe və Finlandiya Prezidenti Aleksandr Stubb iştirak ediblər.
Böyük Britaniya, Fransa, Almaniya və Polşa nümayəndələri, eləcə də Avropa İttifaqı və NATO rəsmiləri də diplomatik məsləhətləşmələrə cəlb olunublar. ABŞ Prezidentinin digər nümayəndəsi Cared Kuşner isə danışıqlara videobağlantı vasitəsilə qoşulub.
Norveç hökumətinin rəsmi məlumatına əsasən, Vitkoff və Kuşnerin görüşlərdə iştirakını Ukrayna tərəfi xahiş edib.
Baş nazir Yonas Qar Störe bildirib ki, təşəbbüsün əsas məqsədi müharibənin dayandırılması istiqamətində diplomatik səyləri daha konstruktiv mərhələyə keçirməkdir.
Danışıqlarda atəşkəs imkanları, Ukraynaya təhlükəsizlik təminatları, enerji təhlükəsizliyi və müharibədən sonrakı bərpa məsələləri müzakirə olunub.
Zelenski Ukraynanın müharibənin başa çatdırılmasında maraqlı olduğunu vurğulayaraq Kiyevin iştirakı olmadan ölkəsinin gələcəyi barədə qərar qəbul edilməməsinin vacibliyini bildirib. O, həmçinin ABŞ Prezidenti Donald Tramp və Rusiya Prezidenti Vladimir Putinlə üçtərəfli görüşün keçirilməsi imkanını gündəmə gətirib.
Diplomatik prosesin növbəti mərhələsinin Rusiyada davam etdirilməsi gözlənilir.
“Reuters” agentliyinin məlumatına görə, Kremlin sözçüsü Dmitri Peskov Stiv Vitkoffun yaxın vaxtlarda Rusiya Prezidenti Vladimir Putinlə görüşəcəyinə ümid etdiklərini açıqlayıb. Peskov bildirib ki, belə görüş ABŞ nümayəndəsinin Ukrayna və Avropa tərəfdaşları ilə apardığı məsləhətləşmələrin nəticələri barədə Moskvanı məlumatlandırması baxımından faydalı ola bilər. Məlumatlara görə, Vitkoff Oslodakı danışıqlarda müzakirə edilən yeni sülh təkliflərini Rusiya tərəfinə təqdim etməyi planlaşdırır.
Norveçdə keçirilən danışıqlar ABŞ ilə Ukrayna arasında son vaxtlar yaranmış fikir ayrılıqları fonunda xüsusi əhəmiyyət daşıyır. Tərəflər arasında hərbi yardımların çatdırılması, kəşfiyyat məlumatlarının paylaşılması və Rusiyaya qarşı iqtisadi təzyiqin davam etdirilməsi məsələlərində fərqli mövqelər mövcuddur.
