NBA finalında “New York Knicks” və “San Antonio Spurs” arasında keçiriləcək üçüncü oyun üçün bilet qiymətləri rekord səviyyəyə yaxınlaşıb.
MSNews.az xəbər verir ki, “Sports.ru”nun məlumatına görə, Nyu-Yorkdakı əfsanəvi “Madison Square Garden” arenasında keçiriləcək üçüncü oyun üçün ən ucuz biletin qiyməti 7500 dollar təşkil edir. Nəşr qeyd edir ki, bu məbləğə satılan yerlər arenanın ən yuxarı və oyunu izləmək baxımından ən narahat sektorlarından biridir.
Bilet qiymətləri təkrar satış bazarında sürətlə dəyişir. “Yahoo Sports”un məlumatına görə, üçüncü oyun üçün ən aşağı giriş qiyməti 9130 dollara, orta bilet qiyməti isə 17 min dollardan çox məbləğə çatıb. Ən bahalı yerlər üçün qiymətlər 100 min dolları keçən elanlarla göstərilib.
Qiymət artımının əsas səbəblərindən biri “Knicks”in final seriyasına uğurlu başlamasıdır. NBA təqviminə görə, “New York Knicks” ilk iki oyunda “San Antonio Spurs”u 105:95 və 105:104 hesabı ilə məğlub edib. Üçüncü oyun iyunun 8-də “Madison Square Garden”də keçiriləcək.
Nyu-York klubu 1973-cü ildən bəri ilk çempionluğunu qazanmaq istəyir. Bu səbəbdən “Knicks” azarkeşləri üçün final oyunları tarixi hadisə kimi qiymətləndirilir. Komandanın uzun fasilədən sonra finalı ev arenasında keçirməsi bilet bazarında tələbi daha da artırıb.
