“Milan”ın ultras azarkeşləri “Yuventus”la oyun zamanı tribunalarda diqqətçəkən etiraz aksiyası keçiriblər. Fanatlar smartfon ekranları vasitəsilə avro işarəsi və “139” rəqəmini göstərərək klubun yüksək bilet qiymətlərinə narazılıqlarını ifadə ediblər.
Etirazın əsas səbəbi “Milan” – “Yuventus” matçı üçün bəzi sektorlarda biletlərin 139 avroya satılmasıdır. “Milan”ın rəsmi bilet satış səhifəsində “Secondo Verde” sektorları üçün qiymətin 139 avro olduğu göstərilir.
Bundan əvvəl “Curva Sud” azarkeş qrupu da klubun bilet siyasətini tənqid etmişdi. “Sempre Milan”ın məlumatına görə, fanatlar “Yuventus”la oyun üçün biletlərin 89 avrodan 399 avroya qədər dəyişməsinə etiraz olaraq aksiyaya çağırış etmişdilər.
Azarkeşlərin smartfonlarla hazırladığı “€139” performansı sosial şəbəkələrdə geniş yayılıb və İtaliyada stadionlara giriş qiymətləri ilə bağlı müzakirələri yenidən gündəmə gətirib. Fanatlar hesab edirlər ki, yüksək qiymətlər futbolu ənənəvi azarkeşlər üçün əlçatmaz edir və stadion atmosferinə mənfi təsir göstərir.
