İsrailin baş hökumət təyyarəsi “Sionun Qanadı” təhlükəsizlik səbəblərinə görə Krit adasına köçürülüb. Bu addım, ABŞ-İran gərginliyinin artdığı və mümkün hərbi eskalasiya ehtimalının mövcud olduğu bir dövrdə atılıb. Məlumatlar, beynəlxalq uçuş izləmə xidmətlərinin verdiyi məlumatlara əsaslanır.
Eyni zamanda, İranda 28 dekabrdan başlayan etiraz aksiyaları ölkə ərazisinin böyük hissəsini əhatə edib. Milli valyutanın kəskin dəyər itirməsi səbəbindən başlayan aksiyalar zaman-zaman polis ilə toqquşmalarla müşayiət olunub və etirazçılar İranın siyasi sisteminə qarşı şüarlar səsləndiriblər. Rəsmi məlumatlara görə, nümayişlər zamanı təxminən iki min nəfər həlak olub.
13 yanvar tarixində ABŞ prezidenti Donald Tramp sosial şəbəkə platforması “Truth Social” üzərindən İranda etiraz edənləri dövlət qurumlarını ələ keçirməyə və etirazları davam etdirməyə çağırıb. Tramp paylaşımında həmçinin qeyd edib ki, “yardım artıq yoldadır” və daha sonra ABŞ-ın müttəfiqlərinə İrandan çıxmalarını tövsiyə edib.
Bu gərginlik fonunda həm İsrail, həm ABŞ, həm də regional aktorlar Tehran və Vaşinqton arasındakı vəziyyəti yaxından izləyir, potensial hərbi eskalasiyaya qarşı hazırlıqlarını davam etdirirlər.
