İsrail ordusunun Livan–Suriya sərhədi yaxınlığındakı ərazilərə təyyarələr vasitəsilə kimyəvi maddə püskürtdüyü iddia edilib.
Məlumat İsrailin “i24NEWS” televiziya kanalının mülki və təhlükəsizlik mənbələrinə istinadla yaydığı xəbərdə yer alıb.
Qüdsdən yayılan xəbərə görə, İsrail ordusunun Şimal Komandanlığı bir neçə həftədir Livan–Suriya sərhədinə yaxın bölgələrdə yabanı otlarla mübarizə məqsədilə havadan püskürtmə əməliyyatları həyata keçirir. Bildirilir ki, İsrailə məxsus təyyarələr son həftələrdə Suriyanın Kuneytra bölgəsində bu məqsədlə bir neçə uçuş həyata keçirib.
Livan sərhədində yerləşdirilmiş Birləşmiş Millətlər Təşkilatının Livandakı Müvəqqəti Sülhməramlı Qüvvələri (UNIFIL) isə İsrail ordusunun püskürtmə əməliyyatları zamanı UNIFIL qüvvələrindən sərhəd xəttindən uzaqlaşmağı xahiş etdiyini açıqlayıb.
“i24NEWS”-un məlumatında vurğulanır ki, püskürdülən maddə zəhərli deyil, əsas məqsəd yabanı bitkiləri məhv etmək və “terrorçuların” İsrail ərazisinə yaxınlaşmasının qarşısını almaqdır. İsrail ordusu isə məsələ ilə bağlı açıqlama verməkdən imtina edib.
Livanın ətraf mühit naziri Tamara əz-Zeyn bildirib ki, Ayta əş-Şab qəsəbəsi və ətraf ərazilərdən İsrail təyyarələrinin pestisid olduğu ehtimal edilən maddələr püskürtdüyünə dair məlumatlar daxil olduqdan sonra Livan Silahlı Qüvvələrinin Baş Qərargah rəisi Rudolf Heykel ilə əlaqə saxlayıb. Nazir maddələrin tərkibini müəyyən etmək məqsədilə təsirə məruz qalmış bölgələrdən analiz üçün nümunələr tələb etdiyini qeyd edib.
UNIFIL daha əvvəl yaydığı açıqlamada İsrail ordusunun “Mavi Xətt” yaxınlığındakı ərazilərdə havadan kimyəvi maddə püskürtmə əməliyyatı barədə onları əvvəlcədən məlumatlandırdığını bildirmişdi. Açıqlamada UNIFIL qüvvələrinin maddələrin toksiklik səviyyəsinin ölçülməsi üçün Livan Silahlı Qüvvələrinə nümunə toplamaqda yardım etdiyi, İsrailin bu fəaliyyətinin qəbuledilməz olduğu, mülki əhalinin sağlamlığını risk altına saldığı və kənd təsərrüfatı sahələrinə mümkün təsirlərlə bağlı ciddi narahatlıq yaratdığı vurğulanmışdı.
Suriya dövlət televiziyası “Əl-İxbariyyə”nin 30 yanvar tarixli xəbərində də İsrail işğal qüvvələrinə məxsus bir kənd təsərrüfatı təyyarəsinin Kuneytranın mərkəzi və şimal hissələrində yerləşən bir sıra kənd və qəsəbələrdə əkin sahələrinin üzərinə “şübhəli mayelər” püskürtdüyü bildirilmişdi. Suriya rəsmi xəbər agentliyi SANA isə oxşar hadisənin yanvarın 25-də də baş verdiyini, İsrail təyyarələrinin Kuneytra kəndlərində naməlum maddələr püskürtdüyünü açıqlamışdı.
