İsrail ordusu (SAXAL) Qəzza zolağının cənubundakı Xan-Yunis bölgəsində HƏMAS-ın “Nuxba” qüvvələrinin iki üzvünün, o cümlədən təşkilatın keçmiş lideri Yəhya Sinvarın mühafizəçisi olmuş şəxsin öldürüldüyünü açıqlayıb.
MSNews.az xəbər verir ki, SAXAL və İsrailin Baş Təhlükəsizlik Xidmətinin (Şin Bet) birgə məlumatına görə, Hazem Musa avqustun 23-də Xan-Yunisə endirilən zərbə nəticəsində öldürülüb. İsrail ordusu onun HƏMAS-ın elit “Nuxba” bölməsinin üzvü olduğunu və 7 oktyabr 2023-cü ildə Reim hərbi bazasına hücumda iştirak etdiyini bildirir.
Növbəti gün eyni bölgədə keçirilən başqa əməliyyat zamanı Razek Sahil Süleyman Əbu Şahma öldürülüb. SAXAL-ın məlumatına görə, Əbu Şahma da 7 oktyabr hücumunda Reim bazasına daxil olan “Nuxba” üzvlərindən biri olub və daha əvvəl Yəhya Sinvarın şəxsi mühafizəçisi kimi fəaliyyət göstərib.
İsrail ordusu hər iki şəxsin son dövrdə SAXAL qüvvələrinə və İsrail mülki əhalisinə qarşı yeni hücumların hazırlanmasında iştirak etdiyini, eyni zamanda HƏMAS-ın hərbi imkanlarının bərpasına çalışdığını iddia edib. Ordunun açıqlamasında bu fəaliyyətlərin mövcud atəşkəs razılaşmasını pozduğu bildirilib.
SAXAL zərbələrin həmin şəxslərin yaratdığı təhlükəni aradan qaldırmaq məqsədilə həyata keçirildiyini bildirib. İsrail tərəfi əməliyyatlardan əvvəl mülki şəxslərə zərər vurma riskini azaltmaq üçün dəqiq sursatlardan və hava müşahidəsindən istifadə edildiyini qeyd edib.
“The Times of Israel” SAXAL-ın yayımladığı görüntülərdə Əbu Şahma və Musanın 7 oktyabr 2023-cü ildə Reim bazasına hücum zamanı göründüyünü yazır. İsrail ordusu Əbu Şahmanın 2018-ci ildə Sinvarın yanında çəkilmiş görüntüsünü də yayımlayıb.
HƏMAS İsrail ordusunun iki şəxsin fəaliyyəti və Əbu Şahmanın Sinvarın mühafizəçisi olması ilə bağlı son açıqlamasını hələlik ayrıca şərh etməyib.
Yəhya Sinvar 2024-cü ilin oktyabrında Qəzza zolağında İsrail qüvvələri ilə qarşıdurma zamanı öldürülmüşdü. O, 7 oktyabr 2023-cü il hücumlarının əsas təşkilatçılarından biri kimi İsrail tərəfindən göstərilirdi.
