İsrail İspaniyanın Qəzza üzrə atəşkəsin icrası və humanitar yardımın koordinasiyası ilə məşğul olan Kiryat-Qatdakı Mülki-Hərbi Koordinasiya Mərkəzində (Civil-Military Coordination Center – CMCC) iştirakını dayandırıb.
“Associated Press”-in canlı yayımına görə, qərarı Baş nazir Benyamin Netanyahu açıqlayıb, daha əvvəl isə İsrail XİN bu addımı elan etmişdi. Kiryat-Qatdakı mərkəz ABŞ-ın rəhbərliyi ilə 2025-ci ilin oktyabrında yaradılıb və Qəzzada atəşkəsə nəzarət, eləcə də, yardım axınının əlaqələndirilməsi üçün fəaliyyət göstərir.
Netanyahu bildirib ki, İspaniya “İsrailə qarşı diplomatik kampaniya” aparır və buna görə bu mərkəzdə tərəfdaş kimi qala bilməz. Onun sözlərinə görə, “İsrailə hücum edənlər regionun gələcəyinin formalaşdırılmasında tərəfdaş olmayacaq.” Nəşr yazır ki, İsrail bu qərarı Madridin açıq anti-İsrail mövqeyi kimi gördüyü xəttlə əsaslandırır.
İsrailin xarici işlər naziri Gideon Saar da İspaniyanın CMCC-də iştirakına icazə verilməyəcəyini bildirib və Madrid hökumətini “anti-İsrail qərəzi”ndə ittiham edib. Son aylarda İspaniya həm Qəzzadakı müharibəni, həm də ABŞ-İsrailin İrana qarşı hərbi əməliyyatlarını sərt tənqid edib, ABŞ hərbi təyyarələrinin İran müharibəsində istifadə üçün İspan bazalarından yararlanmasına imkan verməyib və hava məkanını da məhdudlaşdırıb.
İsrail-İspaniya münasibətləri artıq xeyli vaxtdır gərgin idi. Madrid İsrailə səfirini daimi şəkildə geri çağırıb, İsrail də öz səfirini geri çəkib və hazırda iki ölkədə səfirliklər müvəqqəti işlər vəkilləri səviyyəsində fəaliyyət göstərir. İspaniyanın Fələstini tanıması və İsrailin hərbi əməliyyatlarını tənqid etməsi bu gərginliyi daha da artırıb.
