İran İslam İnqilabı Keşikçiləri Korpusu (SEPAH) İordaniyada ABŞ qüvvələrinin yerləşdiyi iki hərbi bazaya ballistik raket və PUA-larla hücum həyata keçirdiyini açıqlayıb. İordaniya ordusu isə ölkənin hava məkanına daxil olan səkkiz raketin vurulduğunu təsdiqləyib.
MSNews.az xəbər verir ki, “Reuters”-in məlumatına görə, SEPAH hücumun Kral Hüseyn və Əzraq aviabazalarını hədəf aldığını bildirib. Tehran əməliyyatı ABŞ-ın bir neçə saat əvvəl İranın Larak adasındakı raket buraxılış qurğularına endirdiyi zərbəyə cavab kimi təqdim edib.
Əzraq aviabazası kimi təqdim olunan obyekt Müvəffəq Salti aviabazasıdır. ABŞ-İordaniya müdafiə sənədlərində də Müvəffəq Salti bazasının Əzraq yaxınlığında yerləşdiyi göstərilir. Baza İordaniya Kral Hərbi Hava Qüvvələrinə məxsusdur, lakin burada ABŞ hərbi qüvvələri və hava aktivləri də yerləşdirilib.
İordaniya Silahlı Qüvvələri hadisədən sonra rəsmi açıqlama yayaraq avqustun 31-i səhər saatlarında ölkənin hava məkanına daxil olan 8 raketin hava hücumundan müdafiə sistemləri tərəfindən məhv edildiyini bildirib. Ordunun məlumatına görə, raketlər vətəndaşlara və əmlaka təhlükə yaratmamışdan əvvəl vurulub. İordaniya Silahlı Qüvvələrinin açıqlaması
İordaniyanın dövlət agentliyi “Petra” da səkkiz raketin vurulduğunu təsdiqləyib. Rəsmi açıqlamada raketlərin məhz hansı bazaya istiqamətləndiyi göstərilməsə də, SEPAH hücumun iki ABŞ hərbi mövqeyinə qarşı həyata keçirildiyini bildirib.
Beləliklə, ilkin məlumatlarda qeyd olunan “İranın ehtimal ki, İordaniyaya raket zərbəsi endirdiyi” ifadəsi artıq dəqiqləşib: İran hücuma görə məsuliyyəti rəsmən öz üzərinə götürüb. Bununla belə, Tehran hücumun İordaniya dövlətinə deyil, ölkə ərazisində yerləşən ABŞ hərbi qüvvələrinə qarşı yönəldiyini bildirir.
SEPAH əməliyyatı “Punishment of the Aggressor” — “Təcavüzkarın cəzalandırılması” adlandırıb və bazalara ciddi ziyan vurulduğunu iddia edib. Lakin İran tərəfinin bazalara dəymiş ziyanla bağlı açıqlamaları hələ müstəqil şəkildə təsdiqlənməyib. “Al Jazeera” bazalarda insan itkisi barədə məlumat olmadığını yazır.
ABŞ-ın Larak adasına zərbəsi isə Vaşinqtonla Tehran arasında təxminən bir aylıq nisbi fasilədən sonra ilk yeni birbaşa hərbi toqquşmalardan biri olub. ABŞ tərəfi İran qüvvələrinin Hörmüz boğazında dəniz minalarının yerləşdirilməsi üçün raket qurğularından istifadə etməyə hazırlaşdığını bildirib. İran bu iddianı rədd edərək hücuma cavab verəcəyini bəyan etmişdi.
Hazırkı zərbələr ABŞ-İran qarşıdurmasının yenidən kəskinləşməsi və hərbi əməliyyatların Körfəz ölkələrinin ərazisinə yayılması riskini artırır. Hadisələrdən sonra dünya bazarlarında Brent markalı neftin qiyməti yenidən 90 dolları keçib.
