Milli Məclis “İnformasiya, informasiyalaşdırma və informasiyanın mühafizəsi haqqında” Azərbaycan Respublikasının Qanununa dəyişiklik edib. Qanun 15 yanvar 2026-cı il tarixdə qəbul olunub və ictimai mənəviyyatın qorunmasına yönəlib.
Dəyişikliklərə əsasən, qanuna yeni — 13-2.3.6-1-ci maddə əlavə olunub. Həmin maddəyə görə, kütləvi nümayiş etdirildiyi halda ictimai mənəviyyatı təhqir edən, cəmiyyətə açıq hörmətsizlik ifadə edən hərəkətlərə dair məlumatlar qadağan olunan informasiya kateqoriyasına aid edilir. Buraya əxlaqsız ifadələrin səsləndirilməsi, uyğun olmayan jestlər, eləcə də insan bədəninin hissələrinin əxlaq normalarına və milli-mənəvi dəyərlərə zidd formada nümayiş etdirilməsi ilə bağlı məzmunlar daxildir.
Qanun dəyişikliyi ictimai əxlaqın və milli-mənəvi dəyərlərin informasiya mühitində daha effektiv qorunmasını məqsəd qoyur.
