Yanvarın 19-da Davosda keçirilən Ümumdünya İqtisadi Forumu çərçivəsində Azərbaycan Respublikasının Prezidenti İlham Əliyev Danimarkanın aparıcı külək enerjisi şirkətlərindən biri olan Vestas Wind Systems şirkətinin marketinq, kommunikasiya, davamlılıq və ictimaiyyətlə əlaqələr üzrə qrupunun baş vitse-prezidenti Morten Dirholm ilə görüşüb.
Görüş zamanı şirkətin Azərbaycanda bərpaolunan enerji sahəsində, xüsusilə külək enerjisi istiqamətində həyata keçirdiyi layihələrə toxunularaq mövcud əməkdaşlığın genişləndirilməsi üçün əlverişli imkanların olduğu vurğulanıb.
Prezident İlham Əliyev ölkəmizin xarici investorlar üçün cəlbedici məkan olduğunu qeyd edib, Azərbaycanda formalaşdırılan əlverişli investisiya və biznes mühitinin beynəlxalq şirkətlər üçün yeni perspektivlər yaratdığını diqqətə çatdırıb. Görüş çərçivəsində tərəflər Azərbaycan ilə “Vestas Wind Systems” arasında mövcud tərəfdaşlığın inkişafı, yeni layihələrin reallaşdırılması və bərpaolunan enerji sahəsində uzunmüddətli əməkdaşlıq perspektivləri barədə geniş fikir mübadiləsi aparıblar.
