Gürcüstan Pravoslav Kilsəsinin Müqəddəs Sinodu yeni Katolikos-Patriarx postuna üç namizədi müəyyənləşdirib. Gizli səsvermənin nəticələrinə əsasən, namizədlər patriarx taxtının yerini müvəqqəti tutan Senaki və Çxoroçku mitropoliti Şio Mujiri, Mroveli-Urbnisi mitropoliti İov Akiaşvili və Poti-Xobi mitropoliti Qriqol Berbiçaşvili olub.
MSNews.az xəbəri “News Georgia” teleqram kanalına istinadən verir.
Səsvermədə mitropolit Şio Mujiri 20 səs toplayıb. Digər iki namizəd — mitropolit İov Akiaşvili və mitropolit Qriqol Berbiçaşvili isə hərəyə 7 səs alıblar. Yeni patriarx bu üç namizəd arasından genişləndirilmiş kilsə Soborunda gizli səsvermə ilə seçiləcək.
Seçki qaydalarına görə, qalib gəlmək üçün namizəd səsvermədə iştirak edən arxiyereylərin yarıdan çoxunun dəstəyini qazanmalıdır. Genişləndirilmiş kilsə Soborunun mayın 17-dən gec olmayaraq keçirilməsi nəzərdə tutulur.
Yeni Katolikos-Patriarxın seçilməsi prosesi II İliyanın vəfatından sonra başlayıb. II İliya martın 17-də 94 yaşında vəfat edib və onun patriarxlığı Gürcüstan Pravoslav Kilsəsi tarixində ən uzunmüddətli dövrlərdən biri kimi qiymətləndirilir. Mitropolit Şio Mujiri isə yeni patriarx seçilənədək patriarx taxtının yerini müvəqqəti tutur.
