Rusiya Federal Təhlükəsizlik Xidməti (FSB) Moskvadakı Böyük Britaniya səfiri Naycel Keysi və digər britaniyalı diplomatlara qarşı terror aktlarının hazırlanmasının qarşısını aldığını iddia edib. London və Kiyev isə Rusiya tərəfinin versiyasını təsdiqləmir.
MSNews.az xəbər verir ki, FSB sentyabrın 10-da Böyük Britaniyanın Moskvadakı diplomatik missiyasının mühafizəsini həyata keçirən təşkilatda çalışmış, 1981-ci il təvəllüdlü Rusiya vətəndaşının saxlanıldığını açıqlayıb. Barəsində Rusiya Cinayət Məcəlləsinin dövlətə xəyanət maddəsi ilə cinayət işi başlanıb.
Bu barədə FSB-nin İctimaiyyətlə Əlaqələr Mərkəzinə istinadən “RAPSI” və “Kommersant” məlumat yayıb.
FSB-nin iddiasına görə, saxlanılan şəxs ukraynalı bloqer Dmitri Karpenkonun — “Apostol Dmitri” ləqəbi ilə tanınan şəxsin — tapşırığı ilə Britaniya diplomatik missiyasının əməkdaşları barədə məlumat toplayıb. Bunlara diplomatların foto və şəxsi məlumatları, yaşayış ünvanları, istifadə etdikləri avtomobillər, görüş və səfərləri, eləcə də səfirliyin təhlükəsizlik sistemi və keçirilən tədbirlər barədə informasiya daxil olub.
Rusiya xüsusi xidmət orqanı Karpenkonun Ukrayna Təhlükəsizlik Xidmətinin (SBU) maraqları naminə fəaliyyət göstərdiyini və toplanan məlumatların Britaniya səfiri Naycel Keysi və digər diplomatlara qarşı diversiya-terror aktlarının hazırlanmasında istifadə edilməsinin planlaşdırıldığını iddia edir.
FSB-nin versiyasına görə, ehtimal olunan hücumlardan sonra məsuliyyət Rusiyanın üzərinə qoyulmalı, bununla da Londonun Moskva ilə birbaşa hərbi qarşıdurmaya cəlb edilməsi, Ukraynaya əlavə silah tədarükü və Rusiyaya qarşı yeni sanksiyaların tətbiqi üçün zəmin yaradılmalı idi. Bu iddialar müstəqil mənbələr tərəfindən təsdiqlənməyib.
Böyük Britaniyanın Moskvadakı səfirliyi təhlükəsizlik məsələlərinin detallarını şərh etməyib. Lakin missiyanın nümayəndəsi “The Moscow Times” nəşrinə bildirib ki, Rusiya dövlət strukturlarının dezinformasiya vasitəsilə Ukrayna ilə beynəlxalq tərəfdaşları arasında fikir ayrılığı yaratmağa çalışması “adi haldır”.
Ukraynanın Dezinformasiyaya Qarşı Mübarizə Mərkəzi də FSB-nin ittihamlarını rədd edib. Qurum bunu Rusiyanın öz mümkün təxribatlarına əvvəlcədən “informasiya alibisi” yaratmağa yönəlmiş əməliyyatı kimi qiymətləndirib.
