Fransanın xeyrinə casusluq ittihamı ilə Azərbaycanda 10 il müddətinə azadlıqdan məhrum edilmiş Martin Rayan Prezident İlham Əliyevin əfv sərəncamı ilə cəzasının çəkilməmiş hissəsindən azad edilib. Əfv qərarı sentyabrın 23-də imzalanıb.
MSNews.az xəbər verir ki, sərəncamda Ryan Martin Riçard adı ilə qeyd olunan Fransa vətəndaşı Bakı Ağır Cinayətlər Məhkəməsinin 16 mart 2026-cı il tarixli hökmü ilə məhkum edilmişdi. O, 2023-cü ilin dekabrında saxlanılmışdı.
Əfv sərəncamı artıq icra olunub. Martin Rayan Ədliyyə Nazirliyinin Lənkəran Penitensiar Kompleksindən azadlığa buraxılıb.
Fransa Xarici İşlər Nazirliyi də Rayanın əfv olunmasını təsdiqləyərək qərarı humanitar addım kimi qiymətləndirib. Nazirlik bəyan edib ki, qərar Azərbaycan hakimiyyəti ilə aparılan dialoqun nəticəsidir və iki ölkə arasında münasibətlərin normallaşması istiqamətində bir mərhələdir.
