Banqladeşdə “Donald Tramp” ləqəbi ilə məşhurlaşan nadir albinos camış Qurban bayramı ərəfəsində qurban kəsilməkdən xilas edilib.
“Reuters” xəbər verir ki, təxminən 700 kiloqram çəkisi olan camış fərqli açıq rəngli tük örtüyü və alnındakı sarışın kəkilə bənzər görüntüsünə görə sosial şəbəkələrdə geniş yayılıb. Yerli sakinlər və ferma sahibləri heyvana bu görünüşünə görə “Donald Tramp” ləqəbi veriblər.
Heyvan artıq Qurban bayramı üçün alıcıya satılmışdı. Lakin camışın fotoları və videoları sosial şəbəkələrdə viral olduqdan sonra minlərlə insan onu görmək üçün Dəkkə yaxınlığındakı fermaya axışıb. Bu isə həm ictimai marağın artmasına, həm də təhlükəsizlik narahatlığına səbəb olub.
“The Guardian” yazır ki, Banqladeşin daxili işlər naziri Salahuddin Ahmed son anda məsələyə müdaxilə edib. Onun göstərişi ilə camışın qurban kəsilməsi dayandırılıb, alıcıya ödədiyi məbləğ geri qaytarılıb və heyvan Dakka Milli Zooparkına aparılıb.
“Anadolu Agentliyi” isə bildirir ki, camış son həftələrdə ölkədə ən çox danışılan heyvanlardan birinə çevrilmişdi. Ferma sahibi Ziauddin Mridha heyvanın sakit xasiyyətli olduğunu və Banqladeşdə albinos camışların nadir görüldüyünü deyib.
Hadisə Banqladeşdə Qurban bayramı öncəsi heyvan bazarlarında qeyri-adi görünüşlü heyvanlara olan marağı yenidən gündəmə gətirib. “Donald Tramp” ləqəbli camış isə viral şöhrəti sayəsində qurban kəsilməkdən xilas olaraq zooparkda saxlanılacaq.
