Danimarka genişmiqyaslı Avropa müharibəsi zamanı çoxsaylı hərbi itkilərlə üzləşə biləcəyi ssenarisinə hazırlaşır: 2027-ci ilin yanvarından ölkənin hərbi kapellanları mülki kilsə keşişlərinə hərbi dəfn mərasimlərinin keçirilməsi və çoxsaylı həlak olanların qəbul edilməsi üzrə təlim verməyə başlayacaqlar.
MSNews.az xəbər verir ki, Danimarkanın hərbi kapellan xidmətinin rəhbəri Tomas H. Bek bu barədə TV 2-yə danışıb. Danimarkanın “Ritzau” agentliyinin məlumatına görə, hazırlığın əsas səbəblərindən biri Ukraynadakı müharibənin genişmiqyaslı qarşıdurmalarda itkilərin əvvəlki Danimarka hərbi missiyalarından xeyli yüksək ola biləcəyini göstərməsidir.
Bek bildirib ki, Danimarkanın Əfqanıstandakı əməliyyatları zamanı ildə cəmi bir neçə hərbçinin ölümü ilə bağlı prosedurları mövcud kapellan heyəti idarə edə bilirdi. Lakin onun fikrincə, böyük müharibənin ən ağır günlərində 10–20 danimarkalı hərbçinin həlak olması ehtimalını nəzərə almaq lazımdır.
Hazırda Danimarka müdafiə sisteminə 95 keşiş hərbi kapellan kimi bağlıdır. Onlar gündəlik həyatda əsasən yerli kilsələrdə keşiş kimi fəaliyyət göstərirlər, hərbi bölmələr xaricə göndərildikdə isə kapellanlar ordu, donanma və hava qüvvələrinin şəxsi heyəti ilə birlikdə missiyalara qoşula bilirlər. “TV 2 Syd” bu sayın böyük müharibə zamanı yaranacaq ehtiyacları qarşılamaq üçün kifayət etməyə biləcəyini yazır.
Hərbi kapellanlar hərbi mənəvi-psixoloji yardım, beynəlxalq humanitar hüquq və hərbi mühitdə fəaliyyət üzrə xüsusi hazırlıq keçirlər. Yeni proqram isə bu biliklərin bir hissəsini ölkənin digər kilsə keşişlərinə ötürməyi nəzərdə tutur. Onlara hərbi dəfn mərasimlərinin təşkili və qısa müddətdə çoxsaylı həlak olan hərbçilərlə bağlı prosedurlar öyrədiləcək.
Proqram “Folkekirke og Forsvar” — “Xalq Kilsəsi və Müdafiə” layihəsi çərçivəsində həyata keçiriləcək. Danimarka Müdafiə Nazirliyinin 2024-cü il noyabr razılaşmasının rəsmi sənədində layihəyə ümumilikdə 1,8 milyon Danimarka kronu ayrıldığı göstərilir. Danimarka Müdafiə Nazirliyi sənədində vəsaitin üç il üzrə hər il 600 min kron olmaqla nəzərdə tutulduğu görünür.
Ölkənin Silahlı Qüvvələri avqustun 3-də təxminən 1600 gəncin yeni 11 aylıq hərbi xidmət proqramına başladığını açıqlayıb. Əvvəlki modeldə xidmət əksər hallarda dörd ay davam edirdi. Yeni sistemdə isə həm kişilər, həm də qadınlar hərbi xidmət mexanizminə bərabər əsaslarla daxil edilir.
