ABŞ Mərkəzi Qüvvələr Komandanlığının komandanı admiral Bred Kuper İsrailə səfəri çərçivəsində İsrail Baş Qərargah rəisi Eyal Zamir ilə görüş keçirib.
Görüş ABŞ-nin İrana mümkün hərbi zərbə endirib-endirməyəcəyi ilə bağlı müzakirələrin davam etdiyi, eyni zamanda Vaşinqton və Təl-Əviv arasında Qəzza Zolağı ilə bağlı fikir ayrılıqlarının yaşandığı bir dövrə təsadüf edib.
İsrail ordusunun yaydığı açıqlamada bildirilib ki, Kuperin İsrailə səfəri və Zamir ilə keçirdiyi görüş iki ölkə arasında mövcud olan strateji münasibətlərin daha da möhkəmlənməsinə xidmət edir. Açıqlamada bu təmasın İsrail və ABŞ orduları arasında yaxın əməkdaşlığın gücləndirilməsi və müdafiə sahəsində koordinasiyanın dərinləşdirilməsi istiqamətində atılan əlavə addım olduğu vurğulanıb.
Rəsmi məlumatda qeyd olunub ki, admiral Kuper və Baş Qərargah rəisi Zamir arasında uzunmüddətli ikitərəfli görüş baş tutub, lakin müzakirə olunan mövzuların detalları ictimaiyyətlə paylaşılmayıb. Bundan əlavə, CENTCOM komandanının İsrail Silahlı Qüvvələrinin yüksək rütbəli hərbi heyəti ilə ayrıca görüş keçirdiyi də açıqlanıb.
İsrail mediası görüşün regional gərginliyin artdığı bir mərhələdə baş verdiyinə diqqət çəkir. Xüsusilə, ABŞ-nin İrana qarşı mümkün hərbi addımları və Qəzza Zolağında əldə olunmuş atəşkəsin ikinci mərhələsi çərçivəsində atılacaq addımlar Vaşinqton və Təl-Əviv arasında müzakirə mövzusu olaraq qalır. Bu çərçivədə əsas fikir ayrılıqlarından biri İsrailin Qəzzanın dünyaya açılan yeganə çıxış nöqtəsi olan Rəfah Sərhəd Keçidini açmaqdan imtina etməsidir.
Mətbuata sızan məlumatlara görə, ABŞ administrasiyası İsrailə Rəfah keçidinin açılması üçün ciddi təzyiq göstərir. İsrail dövlət televiziyası KAN-a açıqlama verən ABŞ-nin İsraildəki səfiri Mayk Hakabi İsrailin yaxın vaxtlarda Rəfah sərhəd keçidini açmağa məcbur qalacağını bildirib.
Digər tərəfdən, İsrailin təhlükəsizlik kabinetinin bu gün Rəfah Sərhəd Keçidinin açılması və İranla bağlı məsələləri müzakirə etmək üçün toplanacağı gözlənilir. Görüşlərin nəticələrinin bölgədəki siyasi və təhlükəsizlik balansına birbaşa təsir göstərəcəyi ehtimal olunur.
