“Çelsi” baş məşqçi Liam Roseniorla yollarını rəsmən ayırıb. Klubun qərarı Premyer Liqada ardıcıl beş məğlubiyyətdən sonra verilib.
Məlumata görə, komandanı mövsümün sonuna qədər Kalum MakFarlan çalışdıracaq. O, daha əvvəl də Rosenior təyin olunmazdan öncə iki oyunda komandaya müvəqqəti rəhbərlik etmişdi. Beləliklə, londonlular mövsümün qalan hissəsində yenidən keçid dövrünü MakFarlanın rəhbərliyi altında keçirəcək.
Roseniorun gedişi komandanın uğursuz nəticələri və turnir cədvəlində geriləməsi fonunda baş verib. Son məğlubiyyətlərdən sonra klub rəhbərliyi baş məşqçi postunda dəyişiklik etməyi zəruri sayıb.
Hazırda “Çelsi”nin əsas məqsədi mövsümü mümkün qədər sabit şəkildə başa vurmaq və yay üçün yeni baş məşqçi ilə bağlı qərar verməkdir. MakFarlanın müvəqqəti dönəmdə komandaya hansı təsiri göstərəcəyi isə maraqla izlənəcək.
