Böyük Britaniyada körpələrin və üç yaşadək uşaqların terrorizmlə mübarizə çərçivəsində fəaliyyət göstərən Prevent proqramına yönləndirilməsi ciddi müzakirələrə səbəb olub. Yeni araşdırmaya görə, 2016–2025-ci illərdə bu yaş qrupundakı uşaqlarla bağlı 216 müraciət qeydə alınıb və onların yarıdan çoxu polis əməkdaşları tərəfindən edilib.
MSNews.az xəbər verir ki, bu barədə “Hyphen” nəşri informasiya azadlığı haqqında qanun çərçivəsində əldə etdiyi məlumatlara əsasən araşdırma yayımlayıb.
Məlumata görə, 216 müraciətin 125-i polis, 43-ü isə təhsil müəssisələrinin əməkdaşları tərəfindən həyata keçirilib. Müraciətlərin 151-də səbəb kimi “islamçı ekstremizmlə bağlı narahatlıqlar” göstərilib. Bu kateqoriyaya aid müraciətlərin 96-sı, yəni təxminən 64 faizi polis əməkdaşlarının payına düşüb.
Londonda vəziyyət xüsusilə diqqət çəkib. Doqquz il ərzində paytaxtda üç yaşadək uşaqlarla bağlı 77 müraciət qeydə alınıb. Onların 63-ü islamçı ekstremizmlə əlaqədar narahatlıqlar əsasında edilib.
Araşdırma həmçinin göstərib ki, bir yaşdan üç yaşadək uşaqlarla bağlı 3–12 müraciət fərdi dəstək və müdaxilə tədbirlərini nəzərdə tutan Channel proqramına qəbul edilib. Bir yaşına çatmamış körpələrlə bağlı isə bu proqrama qəbul halı qeydə alınmayıb.
Hüquq müdafiəçiləri belə müraciətlərin uşaqların gələcək həyatına mənfi təsir göstərə biləcəyindən narahatdırlar. Onların fikrincə, Prevent proqramına yönləndirilən şəxslərin məlumatları iş bağlandıqdan sonra da digər dövlət məlumat bazalarında saxlanıla bilər.
Britaniya Daxili İşlər Nazirliyi isə bu narahatlıqları rədd edərək məlumatların müvəqqəti saxlanıldığını və ciddi təhlükəsizlik riski istisna olmaqla məxfi qorunduğunu bildirib. Nazirlik vurğulayıb ki, Prevent proqramına yönləndirilmə cinayət qeydiyyatı yaratmır və hər bir müraciət ayrıca qiymətləndirilir.
London Assambleyasının üzvü Benali Hamdaş paytaxt meri Sadiq Xandan polis əməkdaşlarının körpələrlə bağlı müraciətlərdəki rolunu araşdırmağı tələb edib. O, azyaşlı uşaqların ekstremizm riski əsasında qeydiyyata alınmasından ciddi narahatlığını ifadə edib.
Qeyd edək ki, Prevent Böyük Britaniya hökumətinin radikallaşmanın və terrorizmə cəlb olunmanın qarşısını almağa yönəlmiş proqramıdır. Channel isə risk altında olduğu qiymətləndirilən şəxslərə könüllü əsasda fərdi dəstək göstərilməsini nəzərdə tutur.
