Paytaxt Sofiyada yerləşən Bolqarıstan Xalq Məclisində bu məqsədlə növbədənkənar iclas təşkil olunub. İclasda müvəqqəti Baş nazir Andrey Gyurovun formalaşdırdığı hökumətin üzvləri and içərək səlahiyyətlərinin icrasına başlayıblar.
Mərasimdən sonra jurnalistlərə açıqlama verən Gyurov bildirib ki, müvəqqəti hökumətin əsas vəzifəsi ölkədə ədalətli və şəffaf seçkilərin təşkili, eləcə də, daimi hökumət qurulana qədər Bolqarıstanın sakit və rasional şəkildə idarə olunmasıdır. Onun sözlərinə görə, hökumət qərarlarını faktlara və dövlət maraqlarına əsaslanaraq qəbul edəcək.
Müvəqqəti hökumət 19 aprel tarixində keçirilməsi planlaşdırılan erkən parlament seçkilərinədək fəaliyyət göstərəcək. Hökumətin əsas prioriteti seçki prosesinin təşkil edilməsi və seçkilərin legitimliyinin təmin olunması olacaq.
Qeyd edək ki, ölkədə uzun müddətdir davam edən siyasi qeyri-sabitlik fonunda Andrey Gyurovun rəhbərlik etdiyi bu kabinet Bolqarıstanda son beş il ərzində fəaliyyətə başlayan yeddinci müvəqqəti hökumətdir.
